Xitay pulining almashturush qimmiti töwenlidi

Muxbirimiz jüme
2018-02-10
Share

Peyshenbe küni xitay pulining almashturush qimmiti xelq'ara bazarda 1 pirsent töwenlep 2015-yilidin buyanqi eng töwen chekke chüshken.

Fokus soda xewerliri torida körsitishiche, xitay pulining amérika dolliri bilen bolghan almashturush qimmiti yillardin buyan 8 pirsent örligen bolsa, charshenbe we peyshenbe künliri biraqla töwenligen. Bu ikki kündiki töwenlesh nisbiti jem'iy 1. 5 Pirsentke yetken. 

Peyshenbe küni bir yüen xitay pulining bir dollar bilen bolghan almashturush qimmiti 6. 32 Dollargha chüshken. 

"Blumbérg tori" da körsitishiche, xitay pul qimmitining töwenlishige peyshenbe küni xitaydiki eng chong aksiye baziri "Shangxey birleshme indéksi" da körülgen jiddiy töwenleshmu seweb bolghan.

Xewerde neqil qilishiche, sin'gapor AG soda bankisidiki iqtisadshunas ju xaw aksiye baziridiki töwenlesh we soda sanliq melumatliri xitay puligha qarta peyda qilghan bésimning yenila éghir ikenlikini bildürgen.

Halbuki, amérika dollirining bashqa pullar bilen bolghan qimmitini közitidighan wal strét dollar körsetküchige qarighanda, amérika dollirining bashqa 16 döletning puli bilen bolghan almashturush qimmiti 1 pirsent ösken. 

Xitay merkizi bankisi 2015-yili xitay pulining qimmitini sün'iy halda ikki pirsent etrapida töwenletken idi. Emma nöwettiki xewerlerge qarighanda bu qétim xitay pulining qimmiti bazar ehwaligha asasen töwenligen iken.

Bu xil töwenlesh hadisisining aldimizdiki künlerde yene körülidighan yaki körelmeydighanliqi hazirche namelum. 

Emma, "Xitay iqtisadiy waqit géziti" peyshenbe küni élan qilghan obzorida xitay puli qimmitide körülidighan dawalghushning yene bir mezgil dawamlishishi mumkinlikini bildürgen.

Jüme küni xitay aksiye bazirida yene töwenlesh körülgen, töwenlesh 6 pirsent etrapida bolghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet