Xitayda yéngi maqullan'ghan “Memuriy teptish qanuni” xelq'ara organlarning tenqidige uchridi

Muxbirimiz irade
2018.03.20

Xelq'ara kechürüm teshkilati peyshenbe küni bayanat élan qilip, xitay xelq qurultiyi maqullighan “Memuriy teptish qanuni” ni xitaydiki milyonlighan xelqning kishilik hoquqi üchün éghir tehdit, dep körsetti.

Mezkur organning sherqiy asiya diréktori nikolas bikulin bayanatta mundaq dégen: “‛memuriy teptish qanuni‚ xitaydiki kishilik hoquq üchün bir sistémiliq tehdit. Xitaydiki milyonlighan xelqning teqdiri nahayiti sirliq we müjmel bolghan we qanundinmu üstün turidighan bir sistémining shepqitige baghliq bolup qaldi. Yalghuz xitay kompartiyesi teripidin bashqurulidighan bu sistéma xitaydiki edliye sistémilirini bir chetke qayriwetkenliktin, aq - qara, heq - naheqni ayrishtin söz échish mumkin emes”.

“Memuriy teptish qanuni” seyshenbe küni xitay xelq qurultiyida resmiy maqullan'ghan idi. Xitayning shinxu'a axbarat agéntliqi qatarliq agéntliqliri mezkur qanunning xitaydiki chiriklikke qarshi ünümlük halda küresh qilishta zor ehmiyiti barliqini tekitligen. Biraq, xelq'aradiki közetküchiler bolsa bu yéngi qanunning xitaydiki “Öz meyliche tutqun qilish” herikitige yenimu keng yol échip béridighanliqini agahlandurmaqta.

Xelq'ara kechürüm teshkilatining bayanatida bildürülüshiche, “Memuriy teptish qanuni” ning maqullinishi bilen teptish da'irilirining xalighan kompartiye ezasini, biwasite we wasitilik halda hökümet üchün xizmet qilidighan herqandaq bir memuriy xadimni, hakimlarni, ilmiy xadimlarni we dölet igidarchiliqidiki karxana orunliridiki xadimlarni xalighanche tutqun qilish, soraq qilish, héchqandaq qanuniy eyiblesh bolmay turup, 6 ay muddet boyiche qamap qoyush, bu jeryanda ularni adwokat we a'ilisi bilen körüshtürmeslik qatarliqlar hoquqlargha ige bolalmaydiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.