Xitay Uyghur rayonida “Térrorluqqa a'it uchur tarqatqan” yene 15 kishini jazalighanliqini élan qildi

Muxbirimiz erkin
2018.05.09

Xitayning tengritagh tori bügün Uyghur rayonida qanunsiz uchur tarqitishqa chétishliq tipik 11 déloning bir terep qilin'ghanliqini élan qildi.

Xewerdin melum bolushiche, mezkur délolargha chétishliq kishilerning sani 15 bolup, buning ichide 5 nepiri xitay, ikki nepiri ayal, délolar pütünley atalmish térrorluqqa a'it matériyallarni körüsh, saqlash we tarqitishqa a'it mezmunda iken. Xewerde yene bu qétimqisining mushu xil tipik délolarning 13-qétim élan qilinishi ikenliki eskertilgen.

Muhajirettiki Uyghur közetküchiler xewerde qollinilghan “Tipik” sözige asasen, rayonda bu xil eyibleshtiki tutqunning yenila keng-kölemde dawam qiliwatqanliqini perez qilishmaqta.

Norwégiyediki közetküchi zumret xanimning bayan qilishiche, xitay da'irilirining térrorluqqa bu qeder sezgür mu'amile qilishining sewebi, özliri rayonda yillardin béri ijra qilip kéliwatqan chékidin ashqan zorawanliq heriketliri bilen zich munasiwetlik.

Xitay da'irilirining Uyghur rayonida özliri sadir qilghan xataliqlar seweblik endishe ichide yashawatqanliqi we gheyriy normal bixeterlik tedbirlirini qolliniwatqanliqini tekitligen zümret xanim, xitayning öz siyasitini yiltizidin özgermey turup, térror endishisidin xaliy bolalmaydighanliqini eskertti.

Bir qisim xelq'ara közetküchiler, xitay terepning Uyghur rayonidiki térrorluq tehditini mubalighileshtürüwétip barghanliqini ilgiri sürüp kelgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.