Xitayning tashqi qerzi 2 tirilyon 700 milyard dollargha yétip barghan

Xitayning tashqi qerzi 2021-yili 9-ayning axirliri ikki tirilyon 700 milyard dollargha yétip barghan. “Blumbérg xewerliri” agéntliqining bildürüshiche, bu 2 tirilyon 700 milyard dollarliq tashqi qerzining 47 pirsenti uning ottura we uzun muddetlik qerzi iken. Xitay döletlik tashqi péréwot bashqurush idarisining mu'awin bashliqi wang chünying ötken jüme küni élan qilghan bayanatida, xitayning ottura we uzun muddetlik tashqi qerzining ötken yili 6-ayda 3 pirsent artqanliqini éytqan.

Xitay tashqi qerzining artishi uning amérika bilen bolghan soda ‍xtilapi kücheygen, amérika qanun chiqirip, uning mejburiy emgek mehsulatlirigha qarita chekleshni yolgha qoyghan, en'gliye bilen yawropa ittipaqimu bu mehsulatlarni cheklesh toghrisida qattiq bésimgha uchrawatqan bir waqitta yüz bergen. “Blumbérg xewerliri” ning éytishiche, 2021-yilining 3-pesilidila xitay tashqi qerzi omumi sommisigha 167 milyard 700 milyon dollar qoshulghan.

Xewerde, xitay tashqi qerzining artishida chet'el meblegh salghuchilirining xitay zayomini sétiwélishining qismen rol oynighanliqi tekitlen'gen. Biraq “Blumbérg xewerliri” ning éytishiche, xitay döletlik tashqi péréwot bashqurush idarisining mu'awin bashliqi wang chünying, da'irilerning xitay tashqi qerzining kölimi we qurulmisini dawamliq yéqindin nazaret qilip, sermayining chégra halqighan éqish xewpi, shundaqla yershari xaraktérlik yuqum we tereqqiy qilghan iqtisadiy gewdilerning sermayini qisishigha qarita mudapi'e tedbirlirini alidighanliqini bildürgen.