"Zimistan" tori: "Xitay Uyghurlarni jazalash üchün bezide qiltaq quruwatidu"

Muxbirimiz shöhret hoshur
2018-10-17
Élxet
Pikir
Share
Print

Yéqindin buyan Uyghurlar heqqide köplep xewer bériwatqan "Zimistan" tori bügünki bir xewiride özlirining xitay da'irilirining yerlik ahalilerge tarqatqan bir höjjitini qolgha chüshürgenlikini bayan qilghan we bu höjjettiki mezmunlargha asasen xitay da'irilirining Uyghurlarni keng-kölemde jazalash üchün hetta bezide qiltaq quruwatqanliqinimu ilgiri sürgen.

Xewerde déyilishiche mezkur höjjette burun qanunsiz matériyallarni körgen yaki qolida qanunsiz matériyallar bar bolghan kishilerning özini melum qilishi we matériyallarni tapshurup bérishi telep qilin'ghan. Mezkur höjjette özini melum qilghuchilargha kengchilik qilinidighanliqi uqturulghan. "Zimistan" tori ilgiri qeshqerde bir kishining dostidin tapshuruwalghan bir diniy mezmundiki sin filimini hökümetke özlükidin tapshurup bergen bolsimu, uning qilchimu kengchilikke érishelmigenliki, eksiche ashu matériyalni körgen qilmishi üchün 15 yilliq késilgenlikini ilgiri sürgen idi.

Radiyomiz 2016 ‏-yili qeshqer we xotenlerge qarita élip barghan téléfon ziyaretliri dawamida bu jaylarda ahalilerning "Mesile tapshurush yighinliri" gha seperwer qilin'ghanliqi ashkarilan'ghan. Ötken yili oxshash yéza we kentlerge téléfon qilghinimizda bu jaylarda nopusning 20-30 pirsentining tutun qilin'ghanliqi, qaraqashning purchaqchi yézisidiki "Mesile tapshurghan" lardin biriningmu yighiwélish lagérining sirtida qalmighanliqi delillen'gen idi.

Melum bolushiche, "Zimistan" tori mezkur höjjetni Uyghur aptonom rayonidiki alaqe torliri arqiliq qolgha chüshürgen. Mezkur höjjette burun saqal qoyghan we yüzini orughanlarningmu özini melum qilishi kérekliki eskertilgen.

Toluq bet