Aqsaray xitayni rusiyening ukra'inagha qaratqan tajawuzini eyibleshke chaqirdi

Muxbirimiz erkin
2022.02.28
Share on WhatsApp
Share on WhatsApp

Aqsaray 27-féwral küni rusiyening ukra'inagha qaratqan tajawuzchiliq hujumi dawam qiliwatqan, shundaqla rusiye prézidénti wladimir putin yadro qoralliq qisimlirini jiddiy haletke ötküzgen bir waqitta, xitayni rusiyening tajawuzchiliq herkitini eyibleshke chaqirghan.

Roytérs agéntliqining xewer qilishiche, aqsarayning bayanatchisi jén saki xitayning amérika we uning ittipaqdashliri teripidin rusiyege qaritilghan imbargo tedbirlirini qismen ijra qilishqa bashlighan we ‍ötken hepte ukra'inaning igilik hoquqini qollaydighanliqini éytqan bolsimu, biraq xitayning téximu köp ishlarni qilishi kéreklikini éniq körsetken.

Jén saki 27-féwral MSNBC qanilining ziyaritini qobul qilghanda mundaq dégen: “Hazir bir chette qarap turudighan waqit emes. Bu prézidént putin we rosiyening igilik hoquqluq bir döletke tajawuz qilish herikitige awaz chiqiridighan we uni eyibleydighan bir peyt.”

Jén sakining éytishiche, prézidént baydén yéqindin béri xitay rehbiri shi jinping bilen sözliship baqmighan bolsimu, lékin uning yéqin kelgüside ikki terep otturisidiki sözlishish éhtimalliqini chetke qaqmaydiken.

Jén saki yene “Xitay rehberlik qatlimining özige qarap béqishi, tarix kitabliri yézilghanda, ularning qeyerde turushni xalaydighanliqini heqiqiy bahalap béqishi üchünmu muhim qedemlerning barliqi” ni bildürgen.

Rusiye ötken hepte ukra'inagha tuyuqsiz hujum qozghighandin kéyin, xitayning uninggha tutqan pozitsiyesi “Xitay rusiyeni yeng ichide qollawatamdu‚ dégen guman peyda qilghan. Xitay hökümiti rusiyening herkitini “Tajawuzchiliq” dep atashni ret qilghan, shundaqla rusiyege imbargo yürgüzüshke qarshi ikenlikini bildürgen. Xitay ötken hepte rusiyening herkitini “Tajawuzchiliq” dep atashni ret qilghandin kéyin, prézidént baydén “Rusiyening ukra'inagha qaratqan ochuq-ashkara tajawuzchiliqigha köz yumghan herqandaq bir döletning shenige dagh tégidighanliqi” ni bildürgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.