Mutexessisler: "Xitay bilen rusiye herbiy quwwet jehette gherb dunyasigha tehdit peyda qilmaqta"

Muxbirimiz qutlan
2018-02-17
Share

"Hindistan waqit géziti" ning 15-féwraldiki sanida "Mutexessisler, xitay bilen rusiyening herbiy quwwet jehette gherbke yétishiwalghanliqini agahlandurdi" namliq xewer analizi élan qilindi.

Maqalide "Xelq'ara istratégiye tetqiqati instituti" ning 2018-yilliq doklatigha asasen, yéqin kelgüside derijidin tashqiri chong döletler arisida urush yüz bérishining bir tesewwur emeslikini, yeni washin'gton, moskwa we béyjingning sistémiliq halda yüz bergüsi toqunushqa teyyarliniwatqanliqini ilgiri sürgen.

Doklatta yéqinqi 15 yildin buyan xitayning herbiy hazirliqlargha ghayet zor sélinma salghanliqi, gherb ellirining herbiy qoral we téxnika jehettiki eng yéngi netijilirini türlük usullar arqiliq qolgha chüshürüp, özining hawa, déngiz we quruqluq armiyisining urush qilish mahariti bilen herbiy qoral-yaragh téxnikisini yéngilighanliqi tilgha élin'ghan.

Maqalida déyilishiche, xitay armiyisi 2020-yili ishqa kirishtürüshni pilanlawatqan chéngdu j-20 tipliq küreshchi ayropilanning ilghar téxnikisi amérikining shu tiptiki urush ayropilanliridin qélishmaydiken. Undin bashqa xitayning p l-15 tipliq uzun musapilik bashqurulidighan bomba sistémisighimu eng ilghar téxnikilar seplen'gen iken.

Rusiyemu yéqindin buyan özining eng ilghar urush qorallirini süriye we ukra'inada sinaq qilish pursitige ériship, sowét ittipaqi dewridiki herbiy üstünlükini dawamlashturush chüshini körmektiken.

Halbuki, amérika we bezi gherb elliridiki herbiy mutexessisler, gerche xitay bilen rusiye pütün küchi bilen herbiy hazirliqlirini kéngeytiwatqan bolsimu, emma ularning emeliy küchi we urush qilish maharitini amérika we nato bilen sélishturghanda yenila köp arqida turidu, dep qarimaqta. 

Ular, amérikining ilgiriki asiya-tinch okyan istratégiyisini nöwette hindi okyan'ghiche kéngeytishi, jenubiy déngizgha "Karl wénson" namliq awi'amatkisini ewetishi, hindistan, awstraliye, yaponiye qatarliq ittipaqdashliri bilen bolghan herbiy hemkarliqni kücheytishi xitaygha bérilgen bir éniq signal. Amérika alliqachan xitayning herbiy qara niyitining tégige yétip boldi, dégenlerni ilgiri sürmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet