Хитай қораллиқ сақчилири үрүмчидә муқимлиқни қоғдаш қәсәмяд йиғини өткүзди

Мухбиримиз үмидвар
2017.01.01


2017-Йили башлиниш һарписида, йәни 31-декабир күни хитай қораллиқ сақчи қисим әскәрлири вә җамаәт хәвпсизлик сақчилири һәм һәр қайси саһәдин тәшкилләнгән муқимлиқни қоғдаш күчлири бирлишип,””үрүмчидә мәхсус “террорлуққа қарши туруп, муқимлиқини қоғдаш қәсәмяд йиғини”өткүзгән.

Хитай һөкүмәт ахбарат васитилириниң хәвәрлиридин мәлум болушичә, үрүмчигә җайлашқан қораллиқ сақчи қисим баш әтритиниң үрүмчи қиблитағдики “террорлуққа қарши туруш мәшиқ базиси”да өткүзүлгән бу қәсәмяд мурасимиға 2000 әтрапида қораллиқ сақчи қисим әскәр-офитсери вә 1000 дин артуқ җамаәт хәвпсизлик алаһидә сақчиси толуқ қоралланған һалда қатнашқан болуп, йиғин мәйданиға йәнә броневик, һәр хил типтики қораллиқ сақчи қисим аптомобиллири вә башқилар киргүзүлгән.

Мәзкур қораллиқ сақчи вә аманлиқ сақчи әскәрлири өзлириниң һәр хил маһарәтлирини көрсәткән.

Тәңри тағ ториниң хәвәр қилишичә, аптоном район парткоминиң секритари чен чүәнгониң мәхсус буйруқ бериши астида қәсәмяд мурасим паалийити башланған болуп, мурасимға чән чүәнго, аптоном район рәиси шөһрәт закир, сиясий кеңәш рәиси нурлан абдумәнҗин вә башқа хитай рәһбири шәхсләр иштирак қилған.

Шу күнки қәсәмяд мурасимиға қатнашқан қораллиқ сақчи қисим әскәрлири вә җамаәт хәвпсизлик сақчилири йәнә үрүмчи шәһириниң асаслиқ кочилирида вә нуқтилиқ җайларда чарлаш елип барған.

Мулаһизичиләрниң қаришичә, қораллиқ сақчи қисим вә җамаәт хәвпсизлик алаһидә сақчилириниң бу қетимқи қәсәм бериш мурасими шуниңдәк толуқ қоралланған һалда үрүмчи шәһириниң нуқтилиқ җайлирида чарлаш елип бериши,уларниң 28-декабир күни қарақаш наһийилик парткомниң һуҗумға учраш вәқәсидин кейин өзлириниң күч-қудритини көрситиш маневири һесаблинидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.