Бир уйғурни уруп өлтүрүвәткән хитай сақчиға 7 йиллиқ қамақ җазаси берилгән

Мухбиримиз әркин
2017-09-26
Елхәт
Пикир
Share
Принт

2016‏-Йили уйғур елиниң пәйзиват наһийиси шаптул базирида бир уйғур деһқанни уруп өлтүрүвәткән хитай сақчиға 7 йиллиқ қамақ җазаси берилгән.

Пәйзиват наһийәлик сот мәһкимисиниң һөкүмнамисидә қәйт қилинишичә, мәһкимә мәзкур хитай сақчини қәстән набут қилиш билән әйиблигән болсиму, бирақ униң җинайитини тонуп, това қилиши яхши болғачқа вә зиянкәшликкә учриғучиниң аилисиниң әпу қилишиға еришкәчкә униңға йениклитип җаза берилгән.

Мәзкур вәқә 2016‏-йили 5‏-айниң 28‏-күни шаптул базиридики бир тәкшүрүш понкитида йүз бәргән. Шу күни пәйзиват наһийәсиниң турғуни обулқасим мамут 3 чақлиқ мотсиклитини һәйдәп тәкшүрүш понкитидин өтүватқанда униң мотсиклитиниң арқисидики полат чивиқ тәкшүрүш понкитиниң вадикигә илинип қалған. Буниңдин қаттиқ териккән тәкшүрүш понкитиниң мәсули, пәйзиват наһийәлик җ х идариси алаһидә сақчи әтритиниң башлиқи җин шиңтоң обулқасим мамутни тохтитип қаттиқ урған. Обулқасим мамут таяқ зәрбисидә шу замат өлгән.

Наһийәлик тәптиш мәһкимиси җин шиңтоңни вәқәдин 6 ай кейин қолға алған. Тәптиш мәһкимисиниң җин шиңтоңни немә үчүн 6 айдин кейин қолға алғанлиқи мәлум әмәс.

Уйғур аптоном районида бир хитай сақчиниң қәстән адәм набут қилиш билән әйиблинип қамақ җазасиға һөкүм қилиниши аз учрайдиған һадисә.

Көзәткүчиләрниң билдүрүшичә, уйғур районида сақчиларниң уйғурларни наһәқ өлтүрүш вәқәлири көп йүз бәрсиму, бирақ хитай һөкүмити бу хил вәқәләргә сиясий нуқтидин муамилә қилип нурғун вәқәләрни йошуридикән.

Хитай һөкүмити 2009‏-йили «5‏-июл вәқәси» дин кейин хитай аманлиқ күчлиригә техиму зор һоқуқ берип, уларниң уйғурларға халиғанчә оқ чиқириши яки зораванлиқ васитилирини техиму дадил қоллинишиға кәң йол ечип бәргән. Бу хәлқара кишилик һоқуқ вә чәтәлдики уйғур тәшкилатниң изчил тәнқидигә учрап кәлгән. Улар буниң уйғур районида нурғун қанлиқ паҗиәләргә сәвәб болуватқанлиқини агаһландуруп кәлгән иди.

Пикирләр (0)
Share
Толуқ бәт