Xitay dunyaning her qaysi elliride 100 din artuq saqchi ponkiti qurup nazaretchilik élip barghan

Xitay dunyaning her qaysi jaylirida 100 din saqchi ponkiti qurup, sürgünde yashawatqan xitay puqralirini nazaret qilishi, parakendichilik sélish we mejburiy qayturup kétish qatarliq heriketler bilen shughullan'ghan. Amérika simliq xewerler tori, yeni CNN ning xewer qilishiche, xitay bu heriketler bilen shughullinishta bashqa döletler bilen tüzgen ‍öz ara bixeterlik kélishimliridin paydilan'ghan. Italiyediki “Himayichilerni qoghdash teshkilati” bu yil 9-ayda doklat élan qilip, 54 xitay saqchi ponkiti'ining chet ellerde pa'aliyet qilidighanliqini ashkarlighan.

Halbuki, CNN ning 4-dékabir körsitishiche, bu teshkilat xitayning yene qoshumche 48 saqchi ponkitining chet el döletliride pa'aliyet qiliwatqanliqigha a'it yéngi delillerge érishkenlikini éytqan. “Himayichilerni qoghdash teshkilati” ning yéngi doklati, xitay saqchi ponkitlirining kölimi, shundaqla xitayning italiye, krodiye, sérbiye, romaniyeni öz ichige alghan bezi yawropa döletliri bilen bolghan ortaq saqchi kélishimlirining oynawatqan rolini merkiziy nuqta qilghan iken. CNN Ning éytishiche, “Himayichilerni qoghdash teshkilati” xitay jama'et xewpsizlik ministirliqining 53 dölette pa'aliyet qilidighan periqliq töt saqchi da'irisini éniqlap chiqqan bolup, bu saqchi ponkitliri xitaydin kelgen muhajirlargha yardem bérish namida pa'aliyet qilidiken.

Doklatta, italiyening xitay bilen bu xil saqchi kélishimi imzalighan döletlerdin biri ikenliki, 2016-yildin 2018-yilghiche, xitay saqchilirining italiye saqchiliri bilen birlikte rim, milan qatarliq jaylarda ortaq charlash élip barghanliqi, kéyinrek buninggha naplés shehiriningmu qétilghanliqini bildürgen. “Himayichilerni qoghdash teshkilati” ning pa'aliyet dériktori lawra xart CNN de “Bu muz taghning su yüzide körün'gen peqetla kichik bir parchisi” ikenlikini bildürüp, “Her qaysi eller öz döletliridiki qanun bilen idare qilish we kishilik hoquqni qoghdashni xitaydin kelgenler üchün, shundaqla dunyadiki bashqa kishiler üchünmu oxshash mesile dep oylishi kérek” dégen.