Ню-йорк аксийә базири қайтидин хитай телеграф ширкәтлирини пай базиридин чиқириветишни қарар қилди

Мухбиримиз ирадә
2021.01.07

6-январ чаршәнбә күни, ню-йорк аксийә базири йәнә қайтидин хитайниң үч чоң телеграф ширкитиниң пай чәклирини аксийә базиридин чиқириветидиғанлиқини җакарлиди.

Ню-йорк вақти гезитиниң хәвәр қилишичә, ню-йорк аксийә базири трамп һөкүмити вә америка дөләт мәҗлисиниң күчлүк бесим қилиши билән қарарини өзгәртишкә мәҗбур болғаникән.

Алдинқи һәптә ню-йорк аксийә базири президент доналд трамп өткән ноябирда имзалиған мәмурий буйруққа асасән хитайниң үч чоң телеграф ширкити болған ‛хитай бирләшмә хәвәрлишиш ширкити‚, ‛хитай телеграф ширкити‚ вә ‛хитай көчмә хәвәрлишиш ширкити‚ ниң пай чәклирини аксийә тизимликидин чиқириветидиғанлиқини җакарлиған болсиму, бирақ кейин қараридин йенивалған иди.

Ню-йорк аксийә базири болса чаршәнбә күнидики баянатида болса өзлириниң америка малийә министирлиқиниң ташқи мүлкни контрол қилиш ишханисиниң бу һәқтики “йеңи йетәкчи қарари” ни тапшурувалғанлиқини вә америка қанунлириға әмәл қилип, шу бойичә иш көридиғанлиқини җакарлиған.

Ню-йорк вақти гезитиниң ейтишичә, қарар дүшәнбә күнидин етибарән иҗра қилинидикән. Ню-йорк аксийә базириниң бу йеңи қарари америкиниң хитай билән болған малийә алақисини үзүшини тәшәббус қиливатқан бир қисим дөләт мәҗлис әзалириниң махтишиға сазавәр болған.

Кеңәш палата әзаси бен сассе сөзидә “әң асасий очуқ-ашкарилиқ тәлипиниму рәт қилип кәлгән вә хитай армийәси билән мунасивәтлик бу хитай ширкәтлири америкиниң мәблиғидин пайдиланмаслиқи керәк”, дегән.

Бундин илгири “FTSE Russell” вә “S&P”, “Dow Jones” қатарлиқ пайчәк көрсәткүчлири хитай ширкәтлирини йәр шари көрсәткүчидин чиқиривәткән икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.