"Daxu'a" shirkiti kaméralirining Uyghurlarni perqlendürüsh iqtidari diqqet qozghidi

Muxbirimiz irade
2021-02-09
Share

Dunyadiki nazaret kaméra sistémiliri üstide tetqiqat élip baridighan "IPVM" tetqiqat shirkiti bügün yeni 9-féwral küni xitayning eng chong nazaret kamérasi ishlepchiqiridighan "Daxu'a" shirkiti kaméralirining mexsus Uyghurlarni perqlendüridighan iqtidari we bu sistémining qandaq qilip saqchigha signal béridighanliqidek ishlesh jeryani tepsiliy chüshendürülgen bir widiyo ishlep tarqatti. Mezkur widiyo tarqitilghandin kéyin xitay nazaret kamérasi shirketlirining Uyghurlarning kishilik hoquqini éghir derijide depsende qilishqa qatnishiwatqanliqi yene bir qétim munazire qozghidi.

Bügün bu heqte yene amérikadiki "Los-anjilis waqti géziti" dimu xewer tarqitildi.

Xewerde dunyadiki eng chong nazaret kamérasi ishlepchiqarghuchi bolup hésablinidighan bu shirketlerning hélihem amérika bazirini we dunyaning bashqa jaylirini kaméra bilen teminleydighan asasliq menbe boluwatqanliqi tekitlendi.

Xewerdin qarighanda, daxu'a shirkiti gerche amérika hökümiti teripidin jazalan'ghan 20 shirket ichide bolsimu, biraq bu shirket kaliforniyedila kem dégende 80 orun bilen ammiwi toxtam tüzgen, sodining qimmiti 10 milyon dollar qimmitide iken.

"IPVM" tetqiqat shirkiti bu yil 1-ayda, xitaydiki "Hikvision, Dahua we Uniview" qatarliq chong téxnika shirketlirining öz kaméraliridiki Uyghurlarni bayqash, iz qoghlash we nazaret qilish iqtidarining patént hoquqini tizimgha aldurghanliqini ashkarilap zor ghulghula qozghighan idi.

Eyni chaghda, bu xitay shirketliri muxbirlargha qayturghan inkasida "Paténtqa iltimas qilghanliq bu téxnikalar choqum shu meqsette qollinilidu dégenlik emes", dep özini aqlighan.

"Los-anjilis waqti géziti" ning xewiridin qarighanda, yuqiridiki daxu'a qatarliq shirketlerning amérika we bashqa döletler bazarlirigha kiriwatqan kaméralirigha Uyghurlarni perqlendürüsh iqtidari qoshulghan-qoshulmighanliqi éniq emesken, biraq u yenila kishilik hoquq pa'aliyetchilirining küchlük endishisini qozghighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet