Америка хитайниң уйғурларни бастурушида қоли болған Hikvision ширкитини (SDN) қара тизимликигә киргүзүшкә тәйярланмақтикән

Мухбиримиз ирадә
2022-05-05
Share

Америка һөкүмити хитай назарәт камераси техника шеркити болған Hikvision ға җаза тәдбири йүргүзүшкә тәйярланмақтикән.

“малийә вақти гезити” ниң бу мәсилигә алақидар 4 кишиниң сөзигә асасән хәвәр қилишичә, америка малийә министирлиқи “дөләтлик алаһидә бәлгиләнгәнләр тизимлики” (SDN) ни елан қилидиған болуп, адәттә бу тизимликкә киргүзүлгән шеркәтләр билән һәрқандақ америка ширкити яки пуқралириниң алақә қилиши чәклинидикән, бу ширкәтләрниң америкадики мал-мүлүклири тоңлитилидикән.

Hikvision Ширкитиниң назарәт камералири уйғур елида сақчи дөлити системисини ишқа ашурушта кәң көләмдә қоллинилған болуп, у америка һөкүмити тәрипидин кишилик һоқуқ дәпсәндичиликигә шерик болған, дәп әйибләнгән иди. Әгәр Hikvision ширкити һәқиқәтән америка малийә министирлиқиниң юқириқи тизимликигә киргүзүлгән тәқдирдә, еғир ақивәтләргә дуч келидикән.

“малийә вақти гезити” ниң игилишичә, америка һөкүмити алиқачан Hikvision шеркитигә қоймақчи болған җаза тәдбири һәққидә өзиниң шерик дөләтлиригә мәлумат беришни башлиған.

Һазирчә ақсарай вә америка малийә министирлиқи бу хәвәр тоғрилиқ һечқандақ ипадә билдүрмигән, әмма хитай ташқий ишлар министерлиқиниң баянатчиси җав лиҗйән 5-май пәйшәнбә күнидики мухбирларни күтүвелиш йиғинида бу һәқтики хәвәрләрдин қаттиқ биарам болғанлиқини тилға елип: “американиң кишилик һоқуқни баһанә қилип, хитай ширкәтлирини бастурушиға қарши туримиз” дегән.

Америка һөкүмити Hikvision вә дахуа қатарлиқ ширкәтләрни уйғурларни бастурушқа қатнашқанлиқи үчүн уларға қарши җаза тәдбирлирини қоллинишни алиқачан башливәткән, алдинқи мәзгилләрдә президент җов байден қарар мақуллап, америка муәсссәсәлирини Hikvision ға мәбләғ селиштин чәклигән иди.

Һалбуки, ройтерс агентлиқиниң ейтишичә, Hikvision ниң юқиридики SDN тизимликигә киргүзүлүши интайин күчлүк җаза болуп, у америка-хитай мунасивәтлирини йәниму йирикләштүрүши мумкин икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт