Amérika xitayning Uyghurlarni basturushida qoli bolghan Hikvision shirkitini (SDN) qara tizimlikige kirgüzüshke teyyarlanmaqtiken

Muxbirimiz irade
2022.05.05
Share on WhatsApp
Share on WhatsApp

Amérika hökümiti xitay nazaret kamérasi téxnika shérkiti bolghan Hikvision gha jaza tedbiri yürgüzüshke teyyarlanmaqtiken.

“Maliye waqti géziti” ning bu mesilige alaqidar 4 kishining sözige asasen xewer qilishiche, amérika maliye ministirliqi “Döletlik alahide belgilen'genler tizimliki” (SDN) ni élan qilidighan bolup, adette bu tizimlikke kirgüzülgen shérketler bilen herqandaq amérika shirkiti yaki puqralirining alaqe qilishi cheklinidiken, bu shirketlerning amérikadiki mal-mülükliri tonglitilidiken.

Hikvision Shirkitining nazaret kaméraliri Uyghur élida saqchi döliti sistémisini ishqa ashurushta keng kölemde qollinilghan bolup, u amérika hökümiti teripidin kishilik hoquq depsendichilikige shérik bolghan, dep eyiblen'gen idi. Eger Hikvision shirkiti heqiqeten amérika maliye ministirliqining yuqiriqi tizimlikige kirgüzülgen teqdirde, éghir aqiwetlerge duch kélidiken.

“Maliye waqti géziti” ning igilishiche, amérika hökümiti aliqachan Hikvision shérkitige qoymaqchi bolghan jaza tedbiri heqqide özining shérik döletlirige melumat bérishni bashlighan.

Hazirche aqsaray we amérika maliye ministirliqi bu xewer toghriliq héchqandaq ipade bildürmigen, emma xitay tashqiy ishlar ministérliqining bayanatchisi jaw lijyen 5-may peyshenbe künidiki muxbirlarni kütüwélish yighinida bu heqtiki xewerlerdin qattiq bi'aram bolghanliqini tilgha élip: “Amérikaning kishilik hoquqni bahane qilip, xitay shirketlirini basturushigha qarshi turimiz” dégen.

Amérika hökümiti Hikvision we daxu'a qatarliq shirketlerni Uyghurlarni basturushqa qatnashqanliqi üchün ulargha qarshi jaza tedbirlirini qollinishni aliqachan bashliwetken, aldinqi mezgillerde prézidént jow baydén qarar maqullap, amérika mu'essseselirini Hikvision gha meblegh sélishtin chekligen idi.

Halbuki, roytérs agéntliqining éytishiche, Hikvision ning yuqiridiki SDN tizimlikige kirgüzülüshi intayin küchlük jaza bolup, u amérika-xitay munasiwetlirini yenimu yirikleshtürüshi mumkin iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.