Хитайниң хуалиң ширкити бай наһийәсидә чоң көләмлик чарвичилиқ фермиси қурушқа башлиған

Мухбиримиз әркин
2020-10-02
Share

Хитайниң хуалиң сода-санаәт гуруһи бай наһийәсидә 4 милярд 500 милйон йүән мәбләғ селип, чоң көләмлик чарвичилиқ фермиси қурушқа башлиған.

Мәлум болушичә, мәзкур ферма бай наһийәсиниң 40 километир шәрқий-җәнубидики сайрам базирида қурулидикән. Қурулуш түриниң ул селиш мурасими 1-өктәбир күни өткүзүлгән. Мәлум болушичә, бу хуалиң гуруһиниң бу саһәдики әң чоң мәбләғ селиш түри икән. «Җоңго хәвәрлири» намлиқ хитай ахбарат ториниң хәвиридә бу қурулушниң 3-нөвәтлик «шинҗаң хизмити сөһбәт йиғини» үчүн бир тәнтәнә икәнлики тәкитләнгән.

Хитай баш секритари ши җинпиң 9-айниң ахирлирида өткүзүлгән 3-нөвәтлик «шинҗаң хизмити сөһбәт йиғини» да хәлқарада «ирқий қирғинчилик» дәп әйиблинип келиватқан «шинҗаң сиясити» ниң тоғра икәнлики, бу сиясәтниң давамлаштурулидиғанлиқини тәкитлигән. Ши җинпиңниң сөзи хәлқарада қаттиқ тәнқидкә учриған. Бу униң лагер вә мәҗбурий әмгәкни давамлаштуридиғанлиқидин дерәк бериду, дәп қаралған иди.

«Җоңго хәвәрлири» ниң хәвиридә мәзкур ферма ишқа киришсә 10 миң кишиниң ишқа орунлишидиғанлиқини билдүргән, лекин әмгәк күчиниң келиш мәнбәси һәққидә һечқандақ учур бәрмигән. Көзәткүчиләрниң пәрәз қилишичә, бу фермиму һөкүмәт билән бирлишип, уйғурларни «қул әмгеки» гә селиши мумкин икән. Америка авам палатаси йеқинқи 10 күн ичидә уйғурларниң «қул әмгики» гә селинишиға қарши икки қанун лайиһәси мақуллиған. Қанун лайиһәсидә бундақ ширкәтләрниң мәһсулатини америкаға импорт қилиш чәкләнгән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт