Amérika rusiyening ukra'ina urushigha qoral ishlepchiqarghan xitay karxanilirigha émbargo qoydi

Amérika rusiyening ukra'ina urushini ademsiz uchqular bilen teminligen ikki xitay shirkiti we ularning rusiyediki shériklirige émbargo yürgüzgen. Bu amérikaning tunji qétim rusiyening ukra'inadiki urushini toluq qoral sistémisi bilen teminligen xitay shirketlirige qarita émbargo yürgüzüshi hésablanmaqta.

Washin'gton uzundin béri, xitayning rusiyeni herbiy we puqrawi ishlargha qollan'ghili bolidighan buyumlar bilen teminlep kéliwatqanliqini qeyt qilip kelgen bolsimu, emma amérika maliye ministirliqi bu qétim xitayni moskwagha biwasite qoral-yaraq teminligenliki bilen eyibligen. Amérika simliq xewerler tori CNN ning bildürüshiche, amérika maliye ministirliqi bu heqtiki bayanatida, xitayning shyamén we shénjén sheherliridiki ikki ademsiz uchqu shirkitining rusiye herbiy karxanisi bilen hemkarliship, “Garpiya yürüshlik” ademsiz uchqu ishlepchiqarghanliqini bildürgen.

Amérika maliye ministirliqi xitayning “Shyamén limbax ayropilan motori shirkiti” bilen “Shénjén qizil toshqan shilyang sana'et shirkiti” ge émbargo yürgüzgen. Bu ikki shirket rusiyening “Garpiya yürüshlik” ademsiz uchqusining motorini ishlepchiqirish, rusiyege toshush, jümlidin rusiyening TSK Vektor namliq herbiy sana'et shirkiti arqiliq, rusiyeni uchqu motori, aptomatik sanliq melumatlarni bir terep qilish mashiniliri we bashqa éléktironluq zapchaslirini teminlesh bilen eyiblen'gen.

Melum bolushiche, amérika maliye ministirliqi bu qétim yene rusiyening TSK Vektor shirkiti we uning qarmiqidiki shirketlergimu émbargo yürgüzgen. CNN Ning bildürüshiche, amérika tashqiy ishlar ministirliqi bayanatchisi metyéw millér (Matthew Miller) peyshenbe küni muxbirlargha “Biz bizning tunji qétim xitay shirkiti ishlepchiqarghan qorallarning rusiye teripidin urush meydanida ishlitilishige shahit bolushimiz” dégen.