Amérika ana weten xewpsizliki ministirliqi Uyghur mejburiy emgikige chétishliq yene 29 shirketni qara tizimlikke kirgüzdi

Amérika ana weten xewpsizliki ministirliqi 11-ayning 22-küni xitayning yene 29 shirkitini cheklesh tizimlikige kirgüzgen. Buning bilen amérika ana weten xewpsizliki ministirliqining “Uyghur mejburiy emgikining aldini élish qanuni” boyiche qara tizimlikke kirgüzgen xitay shirketlirining sani 107 ge yétip barghan.

Amérika ana weten xewpsizliki ministirliqining mexsus bayanatigha asaslan'ghanda, 2024-yili 11-ayning 25-künidin bashlap, bu 29 xitay shirkitining pütünley yaki qismen ishlepchiqirilghan tawarlirining Uyghur mejburiy emgikige chétishliqi sewebi bilen amérikagha kirishi cheklinidiken. Yéngidin békitilgen bu shirketler yéza igilik mehsulatliri, alyumin mehsulatliri we polisilikon matériyalliri, shundaqla mis, altun, nikél qatarliq renglik métallardin bir qatar mehsulatlarni ishlepchiqiridiken.

Amérika soda wekili katérin tey (Katherine Tai) amérika ana weten xewpsizliki ministirliqining Uyghur mejburiy emgikige chétishliq yene 29 shirketni qara tizimlikke kirgüzüshi heqqide söz qilip mundaq dégen: “Baydén-xarris hökümiti bu shirketlerni tizimlikke qoshush arqiliq, Uyghurlar we shinjangdiki étnik we dinni az sanliq milletlerning mejburiy emgikidin yasalghan tawarlarning amérikagha kirmeslikige kapaletlik qilish iradisini dawamliq namayan qiliwatidu. Shirketler ishchilarni ishlitish arqiliq heqsizlik qilish ewzellikige ige bolmasliqi kérek. Mejburiy emgekke sélishni yoqitish we emgekchilerning hoquqigha dexli-teruz qilghan shirketlerning amérika baziridin nep élishining aldini élish üchün qanunlirimizni ijra qilimiz”.

Amérika hökümiti 2021-yili 6-aydin bashlap “Uyghur mejburiy emgikining aldini élish qanuni” gha asasen, xitayda ishlepchiqirilghan we Uyghur mejburiy emgiki bilen chétishliq dep éniqlan'ghan mehsulatlarni qara tizimlikke élip, ularning amérika chégrasidin kirgüzülüp bazargha sélinishini tosqanidi.