Xitay bir qisim döletlerdiki siyasiy partiye, ijtima'iy teshkilatlarni ürümchide yighin'gha chaqirip, "Shinjang siyasiti" ni aqlidi

Muxbirimiz erkin
2021-02-23
Share

Téximu köp döletlerning Uyghurlargha "Irqiy qirghinchiliq" yürgüziliwatqanliqini étirap qilish weziyitige duch kelgen xitay hökümiti, bir qisim döletlerdiki siyasiy partiye, ijtima'iy teshkilat, tetqiqat orni we aqillar ambarlirigha ürümchide yighin ötküzüp, özining "Shinjangdiki herikiti" ni aqlashni kücheytken. Xitay taratqulirining ashkarilishiche, 22-féwral torda ötküzülgen bu yighinni xitay kompartiyesi merkizi komitétining tashqi alaqe bölümi bilen Uyghur aptonom rayonluq partkom birliship uyushturghan.

Xitay merkizi tashqi alaqe bölümining ündidarda tarqatqan bu heqtiki uchurida, "Jonggo kompartiyesining shinjang hékayisi" dégen témidiki bu tor yighinigha 80 dek dölettiki 200 ge yéqin chet'el siyasiy partiyesi, tetqiqat orni, ijtima'iy teshkilat we aqillar ambiridin 300 dek kishi qatnashqanliqini bildürgen. Biraq uchurda yighin'gha qatnashqan bu siyasiy partiye-guruhlar, tetqiqat orni, ijtima'iy teshkilatlarning ismi, qaysi doletlerde ikenliki tilgha élinmighan. Bu yighinning del kanada parlaménti 22-féwral qarar maqullap, xitayning Uyghurlargha qaratqan depsendichilikini "Irqiy qirghinchiliq" dep étirap qilghan küni ötküzülüshi diqqet qozghidi.

Uchurda, yighin ehlige Uyghur aptonom rayonluq partkomning "Partiyening yéngi dewrdiki shinjangni bashqurush istratégiyesi, merkiziy komitétning orunlashturushini ijra qilish ehwali, her millet xelqini ittipaqlashturush, güzel turmushqa yétekleshtek heqiqi hékayisi tonushturulghanliqi" ilgiri sürülgen. Xitay hökümiti özining Uyghur élidiki siyasitini aqlisimu, lékin xelq'arada uning emeliyettiki herikiti "Irqiy qirghinchiliq" dep qaraydighanlar barghanséri köpeymekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet