Xitay hökümiti Uyghur diyaridiki siyasetlirini téximu chongqurlashturmaqchi

Xitay hökümitining Uyghurlarni basturush herikitini amérika bashchiliqidiki bir qisim gherb döletliri “Irqiy qirghinchiliq” dep étirap qiliwatqanda xitay hökümitining bu qebih qilmishni téximu kéngeytmekchi boluwatqanliqi diqqet qozghidi.

Xitay hökümiti bashqurushidiki “Tengritagh tori” ning 13-iyuldiki xewiride éytilishiche, Uyghur aptonom rayonluq partkom yéqinda mexsus uqturush tarqitip “Partiye merkiziy komitétining yéngi dewrdiki shinjangni idare qilish istiratégiyesini téximu chongqur yiltiz tartquzush lazim” dep körsetken. Mezkur istratégiyening merkizi nuqtisi izchil “Ijtima'iy muqimliq we uzaq mezgillik eminlik” bolup kelgenliki melum.

Xewerde éytilishiche, xitay kompartiyesi qurulghanliqining 100 yilliq xatiriside shi jinpingning sözligen sözini öginish iyul éyida qanat yaydurulmaqchi bolghan “Partiye istilini paklash” teshwiqat éyidiki muhim mezmunlarning biri iken. Bu heriketning deslepki netijisi süpitide turpan, xoten qatarliq jaylarda “Partiye intizamigha xilapliq qilghan” dégen eyib bilen bir türküm rehbiriy kadirlar “Ghulitilghan”. Ularning ghulash ehwali bolsa shu jaylarda herqaysi partiyelik kadirlargha qoyup bérilgen “Saqchi ibret filimliri” de “Étiqadini yoqatqan kadirlar”, “Achközlükke bérilgen chiwinlar” dégendek namlarda bayan qilin'ghan.

Xitay hökümitining bu xildiki heriketliri hemde uni “Chongqur yiltiz tartquzush” toghrisidiki dawranglirini muhajirettiki Uyghur analizchilar “Nöwettiki siyasiy weziyetning téximu qattiq yönülüshke qarap mangidighanliqining béshariti” dédi. Musteqil analizchi élshat hesen bu heqte toxtilip “Xitay kompartiyesi tarixtin buyan ‛istil tüzitish‚ namida partiyening düshmenlirini ghulitip kelgen. Emdilikte bolsa bu arqiliq özliri ‛terbiyelep chiqqan‚ Uyghur kommunist rehberlerni yoqitishning koyigha chüshmekte” dédi.