Хитайниң уйғурларни “ишқа орунлаштуруш” сиясити хитай асаси қануниға уйғун икән

Мухбиримиз әркин
2021-12-13
Share

Уйғур аптоном районлуқ һөкүмәт 10-декабир йәнә ахбарат йиғини өткүзүп, уйғур мәҗбурий әмгикини йәнә рәт қилған, шундақла уйғурларни “ишқа орунлаштуруш” сияситиниң хитай асаси қануниға уйғун икәнликини илгири сүргән. “хитай хәвәрлири” ториниң билдүрүшичә, даириләр уйғурларниң районда “өз-‍өзигә хоҗа болуш, кәсип таллашта әркин” икәнлики, “йеңи өй, йеңи аптомобил вә бәхтлик турмуш” дегән сөзлүкләр райондики һазирқи “йеңи еқим” икәнликини ейтқан.

Бу ахбарат йиғини америка башчилиқидики бәзи дөләтләр бейҗиң қишлиқ олимпикини дипломатик байқут қилған, америка авам палатаси “уйғур мәҗбурий әмгикиниң алдини елиш қанун лайиһәси” ни мақуллиған, шундақла лондон уйғур сот коллегийәси хитайниң уйғурларға қарита ирқий қирғинчилиқ қилғанлиқини елан қилған бир вақитта өткүзүлгән.

Хитай һөкүмити ирқий қирғинчилиқ вә мәҗбурий әмгәкни рәт қилиш билән бир вақитта, хәлқараниң мустәқил тәкшүрүш елип бериш тәләплириниму рәт қилип кәлгән. У бу қетимқи ахбарат йиғинида йәнә аталмиш уйғур деһқан, ишчи вә қанунчилирини сөзгә чиқирип, мәҗбурий әмгәкниң “америка вә ғәрбтики хитайға қарши күчләр тоқуп чиқарған боһтан” икәнликини тәкитлигән.

Йиғинда шинҗаң университети қанун институтиниң оқутқучиси гүлнар идрис “шинҗаң йолға қойған ишқа орунлаштурушқа капаләтлик қилиш сиясити вә униң әмәлийити хитай асаси қануни һәм униң қанун түзүмлиригә пүтүнләй уйғун” икәнликини ейтқан. Бу, хитайниң уйғур мәҗбурий әмгикиниң мәвҗутлуқини тунҗи қетим рәт қилиши әмәс. Хитай һөкүмити йеқинқи 2 йилдин бери уйғурлар тоғрисида 60 нәччә қетим ахбарат йиғини өткүзүп, униңға қаритилған пүтүн әйибләшләрни рәт қилип кәлгәниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт