Xitayning Uyghurlarni “Ishqa orunlashturush” siyasiti xitay asasi qanunigha uyghun iken

Muxbirimiz erkin
2021-12-13
Share

Uyghur aptonom rayonluq hökümet 10-dékabir yene axbarat yighini ötküzüp, Uyghur mejburiy emgikini yene ret qilghan, shundaqla Uyghurlarni “Ishqa orunlashturush” siyasitining xitay asasi qanunigha uyghun ikenlikini ilgiri sürgen. “Xitay xewerliri” torining bildürüshiche, da'iriler Uyghurlarning rayonda “Öz-‍özige xoja bolush, kesip tallashta erkin” ikenliki, “Yéngi öy, yéngi aptomobil we bextlik turmush” dégen sözlükler rayondiki hazirqi “Yéngi éqim” ikenlikini éytqan.

Bu axbarat yighini amérika bashchiliqidiki bezi döletler béyjing qishliq olimpikini diplomatik bayqut qilghan, amérika awam palatasi “Uyghur mejburiy emgikining aldini élish qanun layihesi” ni maqullighan, shundaqla london Uyghur sot kollégiyesi xitayning Uyghurlargha qarita irqiy qirghinchiliq qilghanliqini élan qilghan bir waqitta ötküzülgen.

Xitay hökümiti irqiy qirghinchiliq we mejburiy emgekni ret qilish bilen bir waqitta, xelq'araning musteqil tekshürüsh élip bérish teleplirinimu ret qilip kelgen. U bu qétimqi axbarat yighinida yene atalmish Uyghur déhqan, ishchi we qanunchilirini sözge chiqirip, mejburiy emgekning “Amérika we gherbtiki xitaygha qarshi küchler toqup chiqarghan bohtan” ikenlikini tekitligen.

Yighinda shinjang uniwérsitéti qanun institutining oqutquchisi gülnar idris “Shinjang yolgha qoyghan ishqa orunlashturushqa kapaletlik qilish siyasiti we uning emeliyiti xitay asasi qanuni hem uning qanun tüzümlirige pütünley uyghun” ikenlikini éytqan. Bu, xitayning Uyghur mejburiy emgikining mewjutluqini tunji qétim ret qilishi emes. Xitay hökümiti yéqinqi 2 yildin béri Uyghurlar toghrisida 60 nechche qétim axbarat yighini ötküzüp, uninggha qaritilghan pütün eyibleshlerni ret qilip kelgenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet