Хитай һөкүмитиниң алий мәктәп оқуғучилириға қаритилған сиясий тәшвиқати давам қилмақта

 Йеқинқи мәзгилләрдә хитай һөкүмити уйғур дияридики һәрқайси алий мәктәпләргә өз әмәлдарлирини әвәтиш арқилиқ алий мәктәп оқуғучилириға өзлириниң нөвәттики сиясий  нишанлири үчүн хизмәт қилишни тәкитләп келиватқаниди. Шу қатарда 30-май күни уйғур аптоном районлуқ партком тәшвиқат бөлүминиң башлиқи ваң җйәншин “шинҗаң сәнәт институти”ға келип бир мәйдан сиясий тәшвиқат лексийәси бәргән.

Хитай башқурушидики “тәңритағ” ториниң 30-майдики хәвиридә ейтилишичә, униң лексийәсидә “20-қурултайниң роһини чоңқур өгиниш, йеңи дәврдики шинҗаңни идарә қилиш истратегийәсини толуқ вә тоғра изчиллаштуруш” муһим тема болған. Шуниңдәк алий мәктәп оқуғучилирини хитай миллитиниң “бүйүк гүллиниши” гә күч чиқиришқа дәвәт қилған. У сөзидә ениқ қилип “мәдәнийәт арқилиқ шинҗаңни суғириш партийәмизниң йеңи дәврдики шинҗаңни идарә қилиш истратегийәсиниң муһим тәркиби қисми. Шинҗаң хизмитиниң баш нишанини әмәлгә ашуруш, узун мәзгиллик әминлик орнитишниң түпки вә узун мәзгиллик асаси” дегән.

Ваң җйәншинниң сөзлири хитай һөкүмитиниң нөвәттики “шинҗаңни мәдәнийәт арқилиқ суғириш қурулуши” ниң маһийитини васитилик һалда ечип бәргәнлик, дәп қариливатқанлиқи мәлум. Чүнки улар ейтиватқан бу қурулуштики “мәдәнийәт” ниң уйғур дияридики барлиқ мәдәнийәт саһәсини вәйран қилип, униң орниға хитай мәдәнийитини дәсситиш икәнлики йеқинқи мәзгилләрдә уйғур диярида оттуриға чиққан мәдәнийәт бузғунчилиқида ашкара оттуриға чиққаниди. Бу саһәдики әң типик мисаллар йеқинқи мәзгилләрдә көпләп оттуриға чиқиватқан болуп, үчтурпандики имамлирим йезисида қурулған “дөләт тили мәктипи” ниң мудири қурбан ниязниң уйғур сәбийлиригә хитайчә чаңчилә өгитиши, чақилиқ наһийәсидики уйғур өсмүрлириниң “җуңхуа мәдәнийитиниң сеһри күчини һес қилиши” үчүн уларни чаңчилә ойнашқа тәшкиллишини шулар җүмлисидин дейиш мумкин.