Ürümchide xitay sot mehkimilirining "Yardem bérish" yighini échildi

Muxbirimiz eziz
2021-07-07
Share

Xitay hökümiti bashqurishidiki "Tengritagh tori" ning 7-iyuldiki xewiride éytilishiche, bir kün ilgiri "Memlketlik sot mehkimilirining shinjanggha yardem bérish xizmet yighini" ürümchide chaqirilghan. Uyghur diyaridiki kompartiye sékrétari chén chu'en'go we memliketlik aliy sot mehkimisining bashliqi jow chyang qatarliqlar yighin'gha qatnashqan.

Xewerde éytilishiche, chén chu'en'gu mexsus söz qilip aliy sot mehkimisi we herqaysi xitay ölkiliri sot mehkimilirining "Shinjanggha yardem bérish muhim siyasiy wezipe" dégen qarashning yétekchilikide ijtima'iy muqimliq we uzaq mezgillik eminlik üchün muhm yardemlerde bolghanliqigha alahide rehmet éytqan. U bu heqtiki sözide: "Herqaysi qérindash ölke we sheherlerdiki sot mehkimilirining bundin kéyinki xizmitimizge ilgirikidek qizghin yardemde bolushini hemde qollap bérishini ümid qilimen," dégen.

Jow chyangmu bu heqtiki sözide özlirining "Qanun yardimi" ni ayimaydighanliqini, buning xitay re'isi shi jinping tekitligen "Yéngi dewrdiki shinjangni idare qilish istratégiyisi" ning muhim mezmuni ikenlikini bildürgen.

Muhajirettiki analizchilar bu xitay sot mehkimilirining ötken birnechche yilda Uyghur diyaridiki xalighanche qolgha élish we sot tertipisizla qamaqqa höküm qilishqa yardem bergenler ikenlikini algha sürdi. Radiyomizning bu heqtiki delilleshlirimu lagérlargha qamalghan minglighan Uyghurning sotlanmayla éghir qamaqqa höküm qilin'ghanliqini ispatlighan idi. Ötken birnechche yilda pütün xitay miqyasidiki ölüm jazasi we éghir qamaq jazalirining 20 pirsenttin artuqraqining pütün xitay nopusining bir pirsentigimu yetmeydighan Uyghur diyarida emelge ashqanliqi melum bolghan idi. "Xitay kishilik hoquq hémayichiliri" teshkilatining re'isi réné shya bu heqtiki bayanatta "Bu hal Uyghurlarning xitay hökümiti ijra qiliwatqan 'üch xil küchlerge qarshi turush' herkitining qurbanliri bolup kétiwatqanliqining bir ispati," dégen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet