Бәзи ахбарат васитилири хитай әскәрлириниң сүрийәгә берип болғанлиқини хәвәр қилмақта

Мухбиримиз шөһрәт һошур
2017-12-20
Елхәт
Пикир
Share
Принт

Бүгүн сүрийә хәвәрлири вә йерусалем җамаәт ишлири мәркизи хәвәр торида хитайниң «кечә йолваслири» намлиқ бир алаһидә әтритиниң сүрийәдики уйғур қораллиқ күчлири билән урушуш үчүн бирқанчә күнниң алдида сүрийәгә йетип барғанлиқи хәвәр қилинди.

Хәвәрләрдә учурниң мәнбәси һәққидә бәк көп мәлумат берилмигән, пәқәт ливандики ал-маядәән тор бети вә униң сүрийә һөкүмити билән йеқин мунасивити тилға елинған. Мәзкур хәвәрләрдә дейилишичә, хитай алаһидә әтрити бирқанчә күнниң алдида сүрийәниң оттура деңиздики тарто портиға чүшкән.

«Йерусалем җамаәт ишлири тори» ниң хәвиридә дейилишичә, хитайниң бу қошуни сүрийәдики әсәд реҗимиға қарши күчләр билән һәмкарлишиватқан уйғурлар билән урушуш үчүн барған икән.

Йерусалимниң бу хәвиридә «уйғур бөлгүчилири шәкилләндүрүгән вәтинини қайтурувелиш һәрикәт еқимидин әндишигә чүшкән вә уйғур районида зораванлиқ шәклидики қаршилиқларға дуч кәлгән хитай мәркизи һөкүмити, бөлгүнчилик хаһишлирини пәсәйтишниң койиға чүшти,» дейилгән. Хәвәрдә сүрийәдә 5000 чә уйғур бар дәп қариливатқанлиқи, буларниң сүрийәдә һәр хил гуруппиларда сәп тутқанлиқи әскәртилгән

Хәвәрдә йәнә «йеңи америка» тәтқиқат торидики учурларға асасән хитайниң уйғур мустәқилчилирини бир тәрәп қилишта ғәлибә қилалмиғанлиқи, хитай қолланған бихәтәрлик тәдбирлириниң уйғур районида зораванлиқ һәрикәтлирини көпәйтивәткәндин башқа, уйғур қораллиқ күчлириниң чәтәлләргә еқишиғиму түрткә болғанлиқи илгири сүргән.

Сүрийәдики уйғурлар һәққидә елан қилинған илгирики хәвәрләрдә у йәрдики уйғурларниң башқа чәтәллик җәңчиләргә селиштурғанда көпинчисиниң йенида аилә-бала чақиси барлиқи, шу җайдики йәрлик аһалиләр вә гуруппилар билән маслишип яшаватқанлиқи вә җәңгиварлиқиниң юқирилиқи илгири сүрүлгән иди.

Пикирләр (0)
Share
Толуқ бәт