Bezi axbarat wasitiliri xitay eskerlirining süriyege bérip bolghanliqini xewer qilmaqta

Muxbirimiz shöhret hoshur
2017-12-20
Élxet
Pikir
Share
Print

Bügün süriye xewerliri we yérusalém jama'et ishliri merkizi xewer torida xitayning "Kéche yolwasliri" namliq bir alahide etritining süriyediki Uyghur qoralliq küchliri bilen urushush üchün birqanche künning aldida süriyege yétip barghanliqi xewer qilindi.

Xewerlerde uchurning menbesi heqqide bek köp melumat bérilmigen, peqet liwandiki al-mayade'en tor béti we uning süriye hökümiti bilen yéqin munasiwiti tilgha élin'ghan. Mezkur xewerlerde déyilishiche, xitay alahide etriti birqanche künning aldida süriyening ottura déngizdiki tarto portigha chüshken.

"Yérusalém jama'et ishliri tori" ning xewiride déyilishiche, xitayning bu qoshuni süriyediki esed réjimigha qarshi küchler bilen hemkarlishiwatqan Uyghurlar bilen urushush üchün barghan iken.

Yérusalimning bu xewiride "Uyghur bölgüchiliri shekillendürügen wetinini qayturuwélish heriket éqimidin endishige chüshken we Uyghur rayonida zorawanliq sheklidiki qarshiliqlargha duch kelgen xitay merkizi hökümiti, bölgünchilik xahishlirini peseytishning koyigha chüshti," déyilgen. Xewerde süriyede 5000 che Uyghur bar dep qariliwatqanliqi, bularning süriyede her xil guruppilarda sep tutqanliqi eskertilgen

Xewerde yene "Yéngi amérika" tetqiqat toridiki uchurlargha asasen xitayning Uyghur musteqilchilirini bir terep qilishta ghelibe qilalmighanliqi, xitay qollan'ghan bixeterlik tedbirlirining Uyghur rayonida zorawanliq heriketlirini köpeytiwetkendin bashqa, Uyghur qoralliq küchlirining chet'ellerge éqishighimu türtke bolghanliqi ilgiri sürgen.

Süriyediki Uyghurlar heqqide élan qilin'ghan ilgiriki xewerlerde u yerdiki Uyghurlarning bashqa chet'ellik jengchilerge sélishturghanda köpinchisining yénida a'ile-bala chaqisi barliqi, shu jaydiki yerlik ahaliler we guruppilar bilen masliship yashawatqanliqi we jenggiwarliqining yuqiriliqi ilgiri sürülgen idi.

Toluq bet