Xitayning ilmiy tetqiqat eserlirige süzgüch salmaqchi bolushi xelq'araning qattiq tenqidige uchridi

Muxbirimiz eziz
2017-08-22
Share

Kambrich uniwérsitéti neshriyatining xitay hökümitining telipini ret qilip, tor bétidin öchürüwétilgen maqalilerni eslige keltürüshi ilim sahesining alqishigha érishish bilen birge, xitay hökümitining xelq'aradiki ilmiy tetqiqat dunyasigha tor süzgüchi salmaqchi bolushi küchlük tenqidke uchridi.

“Washin'gton pochtisi” gézitining bügünki bash maqaliside, xitay hökümitining “Nazuk” témilardin bolghan tibetler, Uyghurlar, tyen'enmén qirghinchiliqi qatarliq mesililer heqqidiki tetqiqat maqalilirige süzgüch salmaqchi bolushi, emeliyette xitaydiki puqralarni dawamliq halda zulmette qaldurmaqchi bolghanliqtin bashqa nerse emes, déyilidu.

Maqalide körsitilishiche, xitay hökümitining “Gherb dunyasi xitay bilen soda qilish-qilmasliqni tallash erkinlikige ige. Emma biz bilen soda qilmaqchi bolidiken, jezmen xitayning qanunlirigha hemde yosunlirigha hörmet qilishi lazim” dégen bayanliri emeliyette gherb dunyasini xitay hökümitining xelqni basturidighan qanunlirigha boysunushqa qistighanliqqa barawer iken.

Bu hal gherb dunyasining yillardin buyanqi xitaygha tesir körsitish, ochuq ‏-ashkara bolush, qanun arqiliq idare qilish we démokratiye idiyilirini singdürüsh tirishchanliqining shi jinping hakimiyiti teripidin tosqunluqqa uchrawatqanliqining ipadisi iken.

“Muhapizetchi” gézitining bu heqtiki maqaliside bu mesililer “Amazon”, “Alma” qatarliq shirketlerning xitayda sétilidighan bir qisim mehsulatlirigha süzgüch sélinish bilen birleshtürüp tehlil qilin'ghan hemde buni “Tor süzgüchlükining yéngi pellisi” dep atighan.

“Nyuyork waqti” gézitining bu heqtiki maqaliside bolsa, xitayning bu qilmishi eyiblinip “Ilmiy tetqiqat sahesi we uniwérsitétlarning tetqiqat netijilirige süzgüch sélish emeliyette xitayning dunyagha bergen wedisige pütünley zit kélidu” déyilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet