Хитай сиясий кеңәш рәиси бу йил икки қирғақ мунасивитиниң мурәккәп болидиғанлиқини тәкитлиди

Мухбиримиз үмидвар
2017-01-22
Елхәт
Пикир
Share
Принт


Хитай мәмликәтлик сиясий кеңәш рәиси вә хитай компартийәси мәркизи комитети сиясий бюросиниң даимий һәйәт әзаси йү җеңшең хитай компартийиси мәркизи комитети ачқан тәйвән хизмити йиғинида 2017-йилида тәйвән вә чоң қуруқлуқтин ибарәт икки қирғақ мунасивәтлири һәм тәйвән вәзийитиниң техиму мурәккәп вә қаттиқ болидиғанлиқини әскәрткән.

Шинхуа ториниң хәвәр қилишичә, 2017-йиллиқ тәйвән хизмәт йиғини 20-январ күни бейҗиңда чақирилған болуп, йиғинда сөз қилған йү җеңшең «һәр қандақ шәкилдики тәйвән мустәқиллиқ, бөлгүнчилик һәрикитигә қәтий қарши туруп, дөләтниң игилик һоқуқи вә земин пүтүнлүкини қоғдаш»ни тәкитлигән.

Йү җеңшең сөзидә йәнә 2017-йилида мәркизи комитетниң орунлаштуруши бойичә тәйвән хизмитини яхши ишләшни, тәйвәндики икки қирғақ бир җуңгоға мәнсуп дәп қарайдиған сиясий партийә, җәмийәт вә тәшкилатлар билән иттипақлишишни тәләп қилған. У йәнә тәйвәнликләрниң чоң қуруқлуққа келип оқуш, ишқа орунлишиш, игилик тиклиши вә башқиларда асанлиқ яритип беришни тәкитлигән.

Б б с агентлиқиниң хәвәр қилишичә,бейҗиңда тәйвән хизмәт йиғини ечилған күни америкада президент доналд трампниң президентлиқ вәзиписини тапшурувелиш қәсәмяд мурасими өткүзүлгән иди.

Мутәхәссисләрниң тәһлил қилишичә, америка трамп һөкүмитиниң болғуси тәйвән сиясити хитайни әндишиләндүрмәктә. Доналд трамп сайламда ғәлибә қилғандин кейин униң тәйвән президенти сәй йиңвен билән телефонда сөзлишиши вә хитайниң бир җуңго сиясити һәққидә оз қаришини оттуриға қоюши бейҗиңни биарам қилған иди.

Пикирләр (0)
Share
Толуқ бәт