Генерал милей: “хитай америка вә иттипақдашлири үчүн техиму таҗавузчи вә хәтәрлик болмақта”

Мухбиримиз әркин
2022.07.25
Share on WhatsApp
Share on WhatsApp

Америка армийәсиниң бирләшмә штаб башлиқи генерал марк милей, хитайниң америка вә униң иттипақдашлири үчүн техиму таҗавузчи вә техиму хәтәрлик һалға кәлгәнликини билдүргән. Бирләшмә агентлиқниң хәвәр қилишичә, генерал милей өткән һәптә һиндонезийәни өз ичигә алған һинди-тинч ‍окян районидики дөләтләрдә зиярәттә болған. У бу җәрянда хитай армийәсиниң өткән бәш йилдин буян көрүнәрлик дәриҗидә техиму таҗавузчи, техиму хәтәрлик әһвалға кәлгәнликини ейтқан. Генерал милей “хитай армийәси мәйли деңизда, мәйли һавада болсун бу районда көрүнәрлик вә диққәт қиларлиқ дәриҗидә техиму таҗавузчи һалға кәлди” дәп көрсәткән.

Генерал милейниң ейтишичә, хитай айропиланлири вә парахотлириниң тинч окян районида америка вә униң шериклиригә мудахилә қилиш қетим сани көрүнәрлик ашқан, шундақла хәтәрлик мудахилиләрдә болуш қетим саниму ‍охшаш көләмдә көпәйгән. Генерал милей бу сөзләрни америка хитайниң бу райондики тәсиригә қарши өзиниң тинч ‍окяндики дөләтләр билән болған мунасивитини техиму күчәйткән, байден һөкүмити хитайни “тез күчийиватқан тәһдит”, шундақла американиң әң муһим “узун муддәтлик риқабәтчиси” дәп қараватқан бир вақитта ейтқан. Бирләшмә агентлиқиниң билдүрүшичә, генерал милейниң һинди-тинч окян дөләтлиригә қилған зиярити кәскин рәвиштә хитай тәһдитигә мәркәзләшкән.

Хәвәрдә, униң бу һәптә австралийәниң сидней шәһиридә өткүзүлидиған һинди-тинч окян дөләтлири мудапиә башлиқлириниң йиғиниға қатнишидиғанлиқи, йиғинниң ачқучлуқ темисиму хитайниң изчил күчийиватқан һәрбий күчи вә районда тинч, әркин һәм ечиветилгән бир тинч окянни сақлап қелишни мәркәз қилидиғанлиқи тәкитләнгән. Буниң алдида америка мәркизи истихбарат идарисиниң башлиқиму хитайниң кәлгүси бир нәччә йилда тәйвәнгә қораллиқ һуҗум қилиши мүүкинликини ейтқаниди.

Бирләшмә агентлиқниң билдүрүшичә, хитай азадлиқ армийәсиниң бирләшмә баш штаб башлиқи ли зучең йеқинда генерал милейға хитайниң тәйвәнгә ‍охшаш мәсилиләрдә “мурәссә қилмайдиғанлиқи” ни ейтқан.

Көп көрүлгән хәвәрләр
Қисқа хәвәрләр
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.