Xitay hökümet taratqulirida “Térrorluqqa qarshi küresh” teshwiqati hélihem dawamlashmaqta

Muxbirimiz jewlan
2022.06.14
Share on WhatsApp
Share on WhatsApp

Yéqinda “Xitay xewerliri tori” da jang chényang isimlik bir xitay komandirning “Térrorchilar” bilen jeng qilip, barmaqliridin ayrilip qalghanliqi heqqide tepsiliy xewer bérilgen.

Xewerde éytilishiche, jang chényang Uyghur aptonom rayonluq j x nazariti alahide saqchi etriti 5-tarmaq etritining yétekchisi bolup, 2015-yili 5-ayning 25-küni jenubtiki melum jayda atalmish “Térrorchilarni qorshap yoqitish” opératsiyeside, qarshi terepning yerlik usulda yasighan qol bombisining zerbisige uchrap, sol qolining barmaqliri üzülüp chüshken iken.

Xewerde mundaq bayanlar uchraydu: “2015-Yil 5-ayning 25-küni shinjang saqchiliri jenubiy shinjangda térrorchilarni qorshap yoqitish herikiti élip bériwatatti. Térrorchilar mehellining bir bulungigha yoshuruniwélip, saqchilargha partilighuch étip, jahilliq bilen qarshiliq körsitiwatatti. Bu ‛yerlik bomba‚ larning zerbisi anche küchlük bolmisimu, saqchilarning gösh bilen qandin pütülgen bedini uninggha chidashliq bérelmeytti, shuning bilen qorshap yoqitish herikiti waqtinche toxtitildi. Jang chényang axir saqchilarni bashlap hujumgha ötti, étilghan partlighuchilarni tutuwélip qayturup atti, emma birsi qolida turupla partilap ketti”.

Bu xewerde teshwiq qilinishiche, jang chényang 2020-yil özi telep qilip, toqsun nahiyesige bérip aldinqi septe wezipe ijra qilghan. U wezipe ijra qilish jeryanida 2 milyondin köp mashina, 1milyon 300 ming qétimdin artuq ademni qattiq tekshürgen. 10 Neper “Jinayet gumandari” ni tutqan.

Bu xewerdiki uchurlardin, Uyghur rayonida yüz bergen chong-kichik qarshiliq heriketlirining 2016-yillarghiche dawam qilghanliqi we xélila keskin bolghanliqini bilgili bolidiken. Xitay hökümiti 2001-yildin béri “Térorluq” ni bahane qilip, Uyghurlarni basturushni kücheytken bolsa, 2016-yildin kéyin Uyghurlarni asas qilghan rayondiki musulmanlargha “Térrorchi”, “Diniy ashqun” dégendek bir qatar qalpaqlarni kiydürüp, keng-kölemlik tutqun'gha tor salghan. Qiziqarliqi shuki, yéqindin buyan sirtqa qarita élip barghan teshiwiqatlirida “5 Yildin buyan rayonda térrorluq herikiti yüz bérip baqmidi dégen” xitay, emdilikte “Térrorluqqa qarshi küresh qilish” teshwiqatini yene bazargha salmaqta. Xitay metbu'atlirining jang chényangni “Térorluqqa qarshi küresh qehrimani” qilip sehnige élip chiqishi, ene shu teshwiqatning bir misali hésablinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet