Америкалиқ юқири дәриҗилик һәрбий қомандан: "хитай американиң орнини игиләш пиланини тезлитиватиду"

Мухбиримиз ирадә
2021-03-11
Share

Американиң юқири дәриҗилик һәрбий қомандани "хитай дуня сәһнисидә американиң орнини игиләш пиланини тезлитиватиду" дәп агаһландурди.

Американиң асия-тинч окяндики юқири дәриҗилик һәрбий әмәлдари адмирал филип давидсон америка дөләт мәҗлиси қораллиқ қисимлар комитетида ечилған испат аңлаш йиғинида хитай тәһдити һәққидә ноқтилиқ тохталған. У мундақ дегән: "мән хитайниң америкиниң орнини игиләш пиланини вә бизниң қанун асасидики хәлқара тәртиптики рәһбәрлик ролимизни тартивелиш пиланини тезлитиватқанлиқидин әнсирәймән. Улар узундин буян буни 2050-йилғичә ишқа ашурудиғанлиқини дәп кәлгән, мәнчә, улар нишаниға интайин тез йеқинлишиватиду"

Адмирал филип давидсон йәнә хитайниң кәлгүси 6 йилда тәйвәнни бесивелиши мумкинликини агаһландурған. У у сөзидә: "тәйвән ениқки уларниң нишанлириниң бири. Мән бу тәһдитни алдимиздики он йилда һәтта кәлгүси алтә йилда өзини көрситиду дәп қараймән," дегән.

У 9-март сәйшәнбә күни ечилған испат аңлаш йиғинида хитайни "21-әсирниң хәвпсизликигә болған әң узун муддәтлик истратегийилик тәһдит" дәп, "америка бейҗиң пәйда қиливатқан тәһдитләргә қарита диққәтни ашуруши, илгирики сәл қараш позитсийәсини тәкрарлимаслиқи керәк", дегән.

Давидсон шу күнки сөзидә йәнә хитай тәрәққий қилдуруватқан система вә иқтидарларниң униң таҗавузчилиқ характерини очуқ көрситип беридиғанлиқини, хитай өзини әвәл орунда дәп қариған һаман уни чоқум қоллинишқа урунидиғанлиқини билдүргән. У буниңға мисал көрсәткәндә хитайниң хоңкоңда, уйғур елида қиливатқанлирини вә һиндистан билән болған чигра тоқунушидики позитсийәлирини мисалға елип, "бундин кейин охшаш ишлар гуам вә тәйвәндә йүз бериши мумкин," дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт