Amérikada xitayni “Tehdit” dep qaraydighan amérikaliqlarning nisbiti köpeygen

Muxbirimiz irade
2022.04.28
Share on WhatsApp
Share on WhatsApp

28-April küni amérika paytexti washin'gton'gha jaylashqan nopuzluq tetqiqat merkezliridin biri bolghan péw tetqiqat merkizi (Pew Research Center) ning élan qilishiche, amérikada xitaygha bolghan selbiy qarash yenimu yuqiri pellige chiqqan bolup, 82 pirsent amérikaliqning xitay heqqidiki köz qarishi melum derijide menpiy yaki intayin menpiy iken.

Texminen üchtin ikki qisim quramigha yetken amérikaliqlar xitayning dunyadiki tesir küchining künséri küchiyiwatqanliqi we buning amérikagha selbiy tesir körsitidighanliqigha ishinidiken.

Bu yéngi istatiska doklatidin melum bolushiche, hazir, 62 pirsent amérikaliq xitayni “Riqabetchi” dep qarisa, 25 pirsent amérikaliq xitayni “Düshmen” dep qaraydiken. Bu yil 1-aydiki istatiskida xitayni “Düshmen” dep qaraydighanlarning nisbiti 35 pirsentke örligen bolghan bolup, bu qétimliq istatiskida bu nisbet biraz töwenligen.

Péw tetqiqat merkizining aliy tetqiqatchisi lawra silwér (Laura Silver) ning “Amérika xewerliri” tori (usnews. com) Gha éytishiche, bundaq bolushidiki seweb rusiyening ukra'inagha tajawuzchiliq urushi qozghighanliqi bilen munasiwetlik bolushi mumkin iken. Hazir rusiyeni “Düshmen” dep qaraydighan amérikaliqlarning nisbiti bu yil 1-aydiki 41 pirsenttin éship, 70 pirsentke örligen.

Xewerde éytilishiche, resmiy dölet qatlimidimu amérika-xitay munasiwetliri nurghun sahelerde qattiq jiddiyleshken bolup, amérika dölet mudapiye ministiri loyd ostin xitayni amérika armiyesi üchün uzun muddetlik xiris, dep atighan idi. Bolupmu xitayning rusiyening ukra'inagha qaratqan tajawuzchiliq urushidiki pozitsiyesi amérikaning küchlük diqqitini qozghimaqta.

Ray sinashqa qatnashqanlarning 62 pirsentimu xitayning hazirgha qeder rusiyening ukra'inagha qilghan tajawuzini eyibleshni ret qilishi we moskwa bilen hemkarlishishini amérika üchün intayin diqqet qilishqa tégishlik muhim mesile, dep qarighan.

Lawra silwér xanimning éytishiche, yéqinqi 4 yilda amérikada xitaygha bolghan selbiy qarashlar dawamliq örlep méngiwatqan bolup, bu yerde özgiriwatqini peqet uning örlishige tesir körsitiwatqan amillar iken. Bundaq amillar her qétimda weziyetke qarap turup özgirip mangidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.