Америка авам палатасида «хитай хизмәт гурупписи» қурулуп, хитайниң тәһдитигә тақабил туридиғанлиқи елан қилинди

Мухбиримиз әркин
2020-05-08
Елхәт
Пикир
Share
Принт

Америка авам палатасиниң җумһурийәтчиләр рәһбири кәвен миккарти 7-май күни җумһурийәтчи палата әзалириниң «хитай хизмәт гурупписи» қурулғанлиқи, хизмәт гурупписиниң «хитай тәһдити» гә тақабил туридиғанлиқини билдүргән.

Кәвен миккарти 7-май твиттерда елан қилған бу һәқтики баянатида: «дөлитимиз мәйли сиясий давалғуштин болсун яки ирадиниң бошлуқидин болсун, хитай компартийәси һәққидики агаһландурушларға, бешарәт вә һәтта униңдин келидиған биваситә тәһдитләргә узун йиллардин бери сәл қарап кәлди,» дегән.

Мәзкур хизмәт гурупписи вухәндә партлиған корона вируси юқуми пүтүн дуняни қалаймиқан қиливәткән, хитай һөкүмити вирусни йошуруп, униң башқа дөләтләргә тарқилишиға йол қоюш билән әйиблиниватқан мәзгилдә қурулди. Хитай һөкүмити вирус юқумға айланған дәсләпки мәзгилләрдә дөләт ичидики қатнашни тохтатқан болсиму, лекин хәлқара һава қатнишини тохтатмай юқумниң башқа дөләтләргә тарқилишиға йол ачқан. Бу хитайниң мәқситигә қарита соал пәйда қилған иди.

Кәвен миккартиниң билдүрүшичә, мәзкур хизмәт гурупписиниң мәқсити америка дуч келиватқан хитайниң «пүтүн тәһдитлиригә тақабил туруш» икән. У хизмәт гурупписиниң диққити хитайниң америка вә чәтәл һөкүмәтлиригә, аммиви тәшкилатлириға қарита тәсирини кеңәйтиши, хитайниң експорт вә мәбләғ селиш паалийити, американиң һалқилиқ тәминат зәнҗирлирини монопол қилиши вә техникиға еришиши, америка әслиһәлирини қоллинип, өз адәмлирини тәрбийәлиши, хитайниң корона вируси юқумидики роли, хәлқара органларни контрол қилиши қатарлиқ һәрикәтлиригә қаритилидиғанлиқини билдүргән.

Пикирләр (0)
Share
Толуқ бәт