Amérika awam palatasida "Xitay xizmet guruppisi" qurulup, xitayning tehditige taqabil turidighanliqi élan qilindi

Muxbirimiz erkin
2020-05-08
Share

Amérika awam palatasining jumhuriyetchiler rehbiri kewén mikkarti 7-may küni jumhuriyetchi palata ezalirining "Xitay xizmet guruppisi" qurulghanliqi, xizmet guruppisining "Xitay tehditi" ge taqabil turidighanliqini bildürgen.

Kewén mikkarti 7-may twittérda élan qilghan bu heqtiki bayanatida: "Dölitimiz meyli siyasiy dawalghushtin bolsun yaki iradining boshluqidin bolsun, xitay kompartiyesi heqqidiki agahlandurushlargha, bésharet we hetta uningdin kélidighan biwasite tehditlerge uzun yillardin béri sel qarap keldi," dégen.

Mezkur xizmet guruppisi wuxende partlighan korona wirusi yuqumi pütün dunyani qalaymiqan qiliwetken, xitay hökümiti wirusni yoshurup, uning bashqa döletlerge tarqilishigha yol qoyush bilen eyibliniwatqan mezgilde quruldi. Xitay hökümiti wirus yuqumgha aylan'ghan deslepki mezgillerde dölet ichidiki qatnashni toxtatqan bolsimu, lékin xelq'ara hawa qatnishini toxtatmay yuqumning bashqa döletlerge tarqilishigha yol achqan. Bu xitayning meqsitige qarita so'al peyda qilghan idi.

Kewén mikkartining bildürüshiche, mezkur xizmet guruppisining meqsiti amérika duch kéliwatqan xitayning "Pütün tehditlirige taqabil turush" iken. U xizmet guruppisining diqqiti xitayning amérika we chet'el hökümetlirige, ammiwi teshkilatlirigha qarita tesirini kéngeytishi, xitayning éksport we meblegh sélish pa'aliyiti, amérikaning halqiliq teminat zenjirlirini monopol qilishi we téxnikigha érishishi, amérika eslihelirini qollinip, öz ademlirini terbiyelishi, xitayning korona wirusi yuqumidiki roli, xelq'ara organlarni kontrol qilishi qatarliq heriketlirige qaritilidighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet