Amérika awam palata ezasi jim benks amérikadiki aliy mekteplerni xitay tehditidin agahlandurghan

Amérika dölet mejlisi awam palata ezasi jim benkis (Jim Banks) 21-iyun küni söz qilip, amérika uniwérsitétliridiki 118 kungzi institutidin 104 ning 2022-yilghiche taqalghanliqi yaki taqilish aldida turuwatqanliqini, emma xitay kompartiyesi birlik sep bölümining yenila xitayning amérika uniwérsitétliridiki tesirini kücheytishke urunup kéliwatqanliqini bildürgen. U yene amérika dölet mejlisi we yerlik hökümetni xitay tehditidin agah bolushqa chaqirghan.

Jim benkis amérikadiki en'ene fondi (Heritage Foundation) da qilghan sözide, xitayning amérika aliy ma'aripigha dawamliq tesir körsitishtin waz kechmigenlikini bildürüp mundaq dégen: “Kungzi instituti xitay hökümitining chet'ellerge tesir körsitish istratégiyesining bir qismi. Hazir 118 kungzi institutidin 104 i taqaldi, emma xitay buningliq bilen peylidin yanmidi, belki kungzi institutining programmilirini bashqiche atap, amérika aliy mekteplirini qayil qildi. Amérika tetqiqatchilar jem'iyitining doklatigha qarighanda, kungzi instituti taqalghandin kéyinmu, xitay hökümiti amérikaning aliy ma'aripigha tesiri körsitishke we singip kirishke dawamliq urunup kelmekte”.

Jim benkis sözining axirida amérika hökümiti we her qaysi aliy mekteplerni agahlandurup, xitay hökümitining xilmu xil chirayliq, ilmiy namlar bilen amérikaning aliy ma'aripigha buzghunchiliq qilishidin hoshyar bolushqa chaqirghan.