Америка хитайниң һиндистан вә җәнубий деңизға пәйда қиливатқан тәһдитигә қарши һәрбий һазирлиқини күчәйтмәктикән

Мухбиримиз ирадә
2020-06-25
Елхәт
Пикир
Share
Принт

Америка ташқи ишлар министири майк помпейо хитайниң һиндистан вә шәрқий җәнубий асияға пәйда қиливатқан тәһдити американиң әскәрлирини явропадин йөткишидики сәвәбләрниң бири, дәп көрсәткән.

«Америка мудапиә хәвәрлири» ториниң хәвәр қилишичә, майк помпейо бу сөзләрни 25-июн күнидики «бирюссел мунбири» намлиқ син йиғинида мухбирларни соаллириға җаваб бәргәндә қилған.

У американиң һазир германийәдики базисидики әскәрлирини азайтишидики сәвәбни чүшәндүрүп, америка әскәрлириниң нөвәттә һиндистан вә вийетнам, һиндонезийә, малайсия, филиппин қатарлиқ җәнубий деңиздики дөләтләр дуч келиватқан тәһдит билән йүзлишиш үчүн бу районға йөткиливатқанлиқини билдүргән вә «биз һазирқи дәврдики бу риқабәткә тақабил туруш үчүн мувапиқ һалда тәйярландуқ» дегән.

Фирансийә агентлиқи йеқинда тарқатқан бир хәвәрдин қариғанда америка һазир 375 миң әскирини вә уруш парахотлириниң 60 пирсәнтини һинди-тинч окян райониға орунлаштурған болуп, райондики һәрбий һазирлиқларниң күчийиши диққәт қозғимақта.

Америка авази радийосиниң хәвәр қилишичә, америка армийиси бирләшмә баш шитаблириниң рәиси генерал марк миллей чаршәнбә күни йәни (2020-йили 6-айниң 24-күни) америка деңиз армийәсиниң мәктипиниң оқуш пүттүрүш мурасимида сөз қилғанда райондики һәрбий җиддийлик һәққидә тохталған. У сөзидә «хитай билән болған һәрбий тоқунуш муқәррәр болмисиму, әмма офетсирлар вә әскәрләр йәнила хитай билән уруш қилиш еһтималлиқиға тәйярлиқ қилиши керәк» дегән. Шуниң билән биргә йәнә, деңиз армийәси мәшғулат ишлири катипи адмирал майкел гилдай деңиз армийиси офитсер-әскәрлирини америка билән хитай қисқа муддәт ичидә тоқунушуп қалмайду дегән қараштин ваз кечишкә чақирип, улардин һәр вақит урушқа тәйяр турушни тәләп қилған.

Пикирләр (0)
Share
Толуқ бәт