Хитай таратқулири явропаниң динни башқурушта хитайниң тәҗрибилиридин өгиниши керәкликини тилға алған

Мухбиримиз ирадә
2018-11-08
Share

Хитайда чиқидиған "йәршари вақти гезити" ниң 7-ноябирдики инглизчә нәшридә "явропа җуңгониң динни қандақ башқуруватқанлиқини обдан өгиниши керәк" намлиқ мақалә елан қилинған.

Мақалидә явропа әллириниң диний мәсилиләрдә дуч келиватқан қийинчилиқлири тилға елинип, тиғ учини явропа дөләтлири вә уларниң ахбаратлириға қаратқан.

6-Ноябир күни җәнвәдә ечилған хитайниң кишилик һоқуқ вәзийитигә қарап чиқиш йиғинида көплигән явропа дөләтлири хитай һөкүмитиниң уйғурларға қаратқан қаттиқ қол бастуруш сияситини қаттиқ тәнқид қилған һәмдә хитайниң уйғур елидики аталмиш "йепиқ тәрбийә" лагерлирини тездин тақиши лазимлиқини тәләп қилған иди.

Һалбуки, хитай һөкүмитиниң канийи болған "йәр шари вақти гезити" буниңға дәрһал инкас қайтуруп, "ғәрб ахбарат васитилири җуңгониң шинҗаңдики мусулманлар вә башқа етник гуруппиларға қаратқан аталмиш ‹начар муамилиси' ни тәнқид қилмақта. Улар техи бейҗиңни кәспий техника тәрбийәләш мәркәзлирини тақашқа чақириватиду. Һалбуки, әсәбий исламчиларни йоқитип, авам пуқраларниң диний ашқунларниң яман тәсиригә учриши вә башқа хәтәрләрниң алдини елиш-нөвәттики йәршари характерлик мәсилиләрниң биридур. Шуңа явропа һә десила җуңгуни тәнқид қилиштин бурун өзиниң мәсилилиригә қарап чиқиши керәк," дегән.

"йәр шари вақти гезити" мәзкур мақалисидә йәнә явропа дөләтлириниң һазир җиддий түрдә исламлишиш яки әсәбий исламчиларниң террорлуқ тәһдитигә дуч келиватқанлиқини алаһидә әскәрткән. Мақалидә мундақ дейилгән: "явропа җуңгоға халиғанчә баһа беришниң орниға җуңго билән дәрқәмдә олтуруп, қандақ қилғанда бу ортақ мәсилини һәл қилишниң чарисини издиши керәк."

Мәзкур гезитниң илгири сүргәнлири тивиттердики хитай вәзийитини көзәткүчиләр арисида күчлүк инкас қозғиған. Улар бирдәк бу мақалидә хитайниң уйғур елидә йолға қоюватқан қаттиқ қол сиясити вә лагер түзүми етирап қилинған шундақла хитайниң бу хил тәқиб системисини башқа дөләтләргә експорт қилишқа урунуштәк қара нийити ашкариланған, дәп қаримақта.

Көзәткүчиләр йәнә хитай һөкүмити мусулманларға очуқ-ашкара һуҗум қилип, мусулманларниң явропаға хәвп йәткүзүватқанлиқи тоғрилиқ җар селиватқанда бирму мусулман дөлитиниң оттуриға чиқип җәнвәдики йиғинда хитайни тәнқид қилмиғанлиқиниң толиму әпсуслинарлиқ иш болғанлиқини билдүрмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт