Xitay xelq'ara éghirliq kötürüsh musabiqisige qatnishishtin bir yil cheklendi

Muxbirimiz erkin
2017-10-02
Share

Xelq'ara éghirliq kötürüsh fédératsiyesi düshenbe küni xitayning xelq'ara éghirliq kötürüsh musabiqisige qatnishishining bir yil cheklen'genlikini élan qilghan.

B b s ning xewer qilishiche, xelq'ara olimpik komitéti yéngi téxnikiliq usullarni qollinip, 2008- we 2012‏-yilliridiki xelq'ara olimpik musabiqisidin qalghan beden tekshürüsh ewrishkilirini qayta analiz qilghan. Analiz netijiside saw léy, chén shyéshya, lyu chünxong qatarliq 3 neper xitay éghirliq kötürüsh tenheriketchisining béyjing olimpik musabiqiside rohlandurush dorisi ishletkenliki melum bolghan.

Yuqiriqi 3 neper xitay tenheriketchi 2008‏-yildiki béyjing olimpik musabiqiside altun médalgha érishken. Xelq'ara éghirliq kötürüsh fédératsiyesi bu yilning bashlirida ularning altun médalini qayturuwélishi mumkinlikini bildürgen idi. B b s ning xewiride körsitishiche, xelq'ara éghirliq kötürüsh fédératsiyesi xitaydin bashqa yene rusiye, ukra'inye, ezerbeyjan, bélarusiye, qazaqistan, erméniye we türkiye qatarliq döletlernimu xelq'ara musabiqige qatnishishtin bir yil men'i qilghan.

Xelq'ara olimpik komitéti bu döletlerning éghirliq kötürüsh tenheriketchiliriningmu rohlandurush dorisi ishletkenlikini bayqighan. Xelq'ara éghirliq kötürüsh fédératsiyesi 2016‏-yili eger herqandaq dölettin 3 yaki uningdin artuq tenheriketchining rohlandurush dorisi ishletkenliki bayqalsa, bu döletning musabiqidin bir yil men'i qilinidighanliqini bildürgen.

Mezkur organning qeyt qilishiche, xitayni öz ichige alghan yuqiriqi 9 dölet bu yil noyabirda amérikaning kaliforniye shtatida ötküzülidighan dunya éghirliq kötürüsh chémpiyonluq talishish musabiqisige qatnashturulmaydiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet