Uyghur élide yene 9 adem “Térrorluqqa qarishi turush qanuni” gha asasen jazalan'ghan

Xitay da'iriliri bu yil kirgendin buyan Uyghur élide yene 9 ademni “Térrorluqqa qarishi turush qanuni” we “Intérnét uchur bashqurush chariliri” ge asasen jazalighan.

Tengritagh torining ashkarilishiche, bu 9 ademning arisida 1 qazaq 3 xitay bolghandin bashqa, qalghanlirining hemmisi Uyghur iken.

Xewerde bular üstidin turghuzulghan atalmish“Délo” larning xaraktéri sherhlen'gen, jawabkarning yéshi we milliti körsitilgendin bashqa héchqaysisining toluq ismi bérilmigen.

Xewerde aptonom rayonluq intérnét uchur bashqurush ishxanisi 10 türlük “Qanunsiz uchur tartish délosi” ni bir terep qilghanliqi körsitilgen bolup, buning arisida peqet birla jawabkar ötken yili martta bir terep qilin'ghan, qalghan toqquzeylen bu yil féwraldin aprélning béshighiche bir terep qilin'ghanlar iken.

Jawabkarlarning eng chongi 39 yash, kichiki 22 yash bolup, bularning arisida qazaq we Uyghur jawabkarlargha “Térrorluqqa a'it widiyo tarqatqan”, “Esebiylikke a'it un-sin buyumlirini saqlighan” we “Diniy esebiylikke a'it resimlerni tarqatqan” dégen jinayetler artilghan bolsa, xitay jawabkarlargha “Torda ösek söz tarqatqan” dégen jinayet artilghan.

Bularning arisida qorghas nahiyeside qolgha élin'ghan 33 yashliq qazaq yashqa ötken yili martta 6 ayliq qamaq jazasi bérilgendin bashqa, bu yil bir terep qilin'ghan 9 kishining hemmisige memuriy jehettin tutup turush jazasi bérilgen.

Xitay da'iriliri ötken yili özining atalmish “Térrorluqqa qarishi turush qanuni” ni maqullighan. Mezkur qanunda térrorluq da'irisige kirgüzülgen maddilarning kengriliki we térrorluqqa bérilgen sherhlerning müjmelliki kishilik hoquq teshkilatlirining diqqitini qozghighan.

Ular, mezkur qanunning yenimu köp bigunah kishilerning jazagha tartilishigha yol échip bérishidin endishe qilidighanliqini bildürüshken.

Ürümchi da'iriliri bu yilning béshida bir xitay puqrasini intérnét tosuqliridin ötidighan tam atlash yumtali chüshürgenliki üchün qolgha alghan we uningghimu “Térrorluqqa qarshi turush qanuni” gha asasen 15 künlük memuriy tutup turush jazasi bergen idi.