Хитай америкини террорлуққа "икки хил өлчәм" қоюш билән әйиблиди

Мухбиримиз ирадә
2015-12-23
Share

Хитай бүгүн америкини террорлуққа қарши күрәштә "икки хил өлчәм" қоллиниш билән әйиблиди. Америка дөләт ишлири министирлиқи сәйшәнбә күни хитай мақуллаш алдида турған "террорлуққа қарши туруш қануни" хитайда пикир әркинлики, намайиш - йиғилиш қилиш вә диний әркинликни йәниму илгириләп қамал қилиши мумкин, дегән иди.

Фирансийә агентлиқиниң хәвәр қилишичә, хитай ташқи ишлар министирлиқи баянатчиси хуң лей чаршәнбә күни буниңға инкас қайтуруп: "америкиниң әйиблишини асассиз, дегән шундақла америкиниң әндишиси униң террорлуққа ‹икки хил өлчәм' қоллиниватқанлиқини көрситип бериду" дегән.

Ройтерс агентлиқи бу һәқтики хәвиридә, мәзкур қанун лайиһисиниң хитай һөкүмити хитайда болупму уйғур елидә қораллиқ күчләр вә бөлгүнчиләрниң тәһдити зорийиватқанлиқини илгири сүрүватқан бир мәзгилдә елан қилинғанлиқини, бирақ кишилик һоқуқ органлириниң уйғур елидики вәқәләрниң йәрлик хәлқниң һөкүмәткә болған наразилиқидин келип чиқиватқанлиқини илгири сүридиғанлиқини баян қилған.

Кишилик һоқуқ органлири хитай һөкүмитиниң бу қануниниң уйғур елидики бастуруш һәрикәтлирини шундақла хитайдики пуқраларниң әркинликини қамал қилиш һәрикәтлирини қанунийлаштурушидин әнсиримәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт