Хитай “терроризмға қарши туруш” қанунии мақуллиди

Хитай мәмликәтлик хәлқ қурултийи даимий комитети, йәкшәнбә күни хитайниң тунҗи ‛терроризмға қарши туруш‚ қанунини мақуллап, бу қанунни 2016 - йили 1 - январдин башлап иҗра қилидиғанлиқини җакарлиди.

Хитайниң шинхуа агентлиқиниң хәвәр қилишичә, хәлқ қурултийиниң 159 нәпәр даимий һәйәт әзаси бирдәк бу қанунини қобул қилиш авази бәргән. Хитай дөләт рәиси ши җинпиң бу қанунни тәстиқлиған.

Хитай өзиниң мәзкур қануниға тайинип, терроризмға қарши қаттиқ зәрбә беридиғанлиқини йәнә бир қетим тәкитлиди.

Хитайниң мәзкур тунҗи “терроризмға қарши туруш” қануни хәлқара җәмийәтниң диққитини тартқан болуп, униң маддилири хитайдики кишилик һоқуқ, пуқралар һоқуқи вә сөз әркинлики вә башқа саһәләргә аит түрлүк әндишилик инкасларни кәлтүрүп чиқарған иди.

Ройтерсниң хәвәр қилишичә өткән сәйшәнбә күни америка хитайниң мәзкур қануниға диққәт қиливатқанлиқини билдүргән иди. Америка дөләт ишлири минситирилиқи баянатчиси габрелла прайсе хитайниң мәзкур қануниға қарита, “терроризмға қарши туруш қанунниң хитайдики сөз әркинлики, җәмийәтләргә уюшуш, тинчлиқ намайиши өткүзүш вә диний әркинликкә қарита техиму бир қәдәм чәклимә кәлтүрүп чиқириду дәп қараймиз” дегән иди