Хитай даирилири җәнвәдә "шинҗаң яхши җай" намлиқ син йиғини ечип, өз қилмишлирини ақлашқа урунған

Мухбиримиз ирадә
2021-02-04
Share

Хитай һөкүмити уйғурларға қаратқан ирқий қирғинчилиқ вә инсанийәткә қарши җинайәт сәвәбидин хәлқарада күчлүк тәнқидкә учраватқан бир мәзгилдә, хәлара сәһниләрдә йәнә тәшвиқат арқилиқ өзини ақлимақчи болған.

Шинхуа ториниң хәвиригә қариғанда, хитайниң җәнвәдә турушлуқ даимий өмики вә уйғур аптоном районлуқ һөкүмәт 3-феврал күни бирликтә "шинҗаң яхши җай" темисида синлиқ йиғин ечип, уйғурларниң хошал-хорам яшаватқанлиқини, уларниң һоқуқлириниң толуқ капаләткә игә икәнликини илгири сүргән.

Бу тәшвиқат йиғинида уйғур аптоном районлуқ ислам җәмийитиниң рәиси, үрүмчидики ислам иниститутиниң мудири абдуреқип төмүрнияз вә үрүмчидики бәйтулмәимур мәсчити (ноғай мәсчити) ниң имами мөһтирәм шерипләрни сөзләткән.

Шинхуа ториниң хәвиридә мунулар дейилгән: "син йиғинида шинҗаңниң тәбиий мәнзириси, тәрәққият мувәппәқийәтлири вә кишиләрниң бәхтлик турмушини әкис әттүридиған бир йүрүш қисқа филимлар қоюлди. Абдуреқип төмүрнияз вә мөһтирәм шерипләр филимға бирләштүрүп туруп, шинҗаңниң диний етиқад әркинликини тонуштурди. Шинҗаңдики кәспий маһарәт вә тәрбийәләш мәркизини пүттүргән оқуғучилар өзлириниң ашқун идийәләрдин қутулуш вә әмгәк маһаритини игиләш җәрянлирини шундақла өгиниш арқилиқ еришкән нормал турмушиға аит кәчүрмишлирини сөзләп бәрди. . ."

Мәлум болушичә, бу син йиғинида йәнә уйғур аптоном районлуқ парткомниң даимий һәйити вә хәлқ һөкүмитиниң муавин рәиси әркин туниязму сөз қилип: "шинҗаңда уда төт йилдин буян зораванлиқ терорлуқ вәқәси йүз бәрмиди, кишиләрниң бихәтәрлик туйғуси көрүнәрлик ашти," дегән кона муқамини тәкрарлиған. Хитайниң җәнвәдә турушлуқ даимий вәкили чен шү болса "бәзи дөләтләр вә бәзи күчләр шинҗаңдики яхши вәзийәтни көрүшни халимайду һәмдә пакитни қәстән бурмилап, хитайни һақарәтләйду вә ялған сөзләйду," дегән.

Юқириқи бу тәшвиқат йиғиниға лаос, куба, шималий корийә, росийә, пакистан, иран, еритрийә қатарлиқ диктаторлуқ билән даңқи чиққан асия-африқадики бир қисим дөләтләрниң вәкиллири аңлиған.

Чәт әлләрдики уйғур көзәткүчиләр буни хитай һөкүмитиниң хәлара сәһниләрдики әң ахирқи қуруқ урунушлири, дәп һесаблимақта. Улар америка һөкүмити хитайниң уйғур елида йүргүзиватқан зулумлирини "ирқий қирғинчилиқ" вә "инсанийәткә қарши җинайәт" дәп баһалиған, ғәрб мәтбуатлирида бу һәқтики дәлил-пакитлар арқа-арқидин паш болуватқан бир әһвалда, хитай һөкүмитиниң һәрқанчә қилипму өзини ақлап болалмайдиғанлиқини билдүрүшмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт