Xitay da'iriliri jenwede "Shinjang yaxshi jay" namliq sin yighini échip, öz qilmishlirini aqlashqa urun'ghan

Muxbirimiz irade
2021-02-04
Share

Xitay hökümiti Uyghurlargha qaratqan irqiy qirghinchiliq we insaniyetke qarshi jinayet sewebidin xelq'arada küchlük tenqidke uchrawatqan bir mezgilde, xel'ara sehnilerde yene teshwiqat arqiliq özini aqlimaqchi bolghan.

Shinxu'a torining xewirige qarighanda, xitayning jenwede turushluq da'imiy ömiki we Uyghur aptonom rayonluq hökümet 3-féwral küni birlikte "Shinjang yaxshi jay" témisida sinliq yighin échip, Uyghurlarning xoshal-xoram yashawatqanliqini, ularning hoquqlirining toluq kapaletke ige ikenlikini ilgiri sürgen.

Bu teshwiqat yighinida Uyghur aptonom rayonluq islam jem'iyitining re'isi, ürümchidiki islam inistitutining mudiri abduréqip tömürniyaz we ürümchidiki beytulme'imur meschiti (noghay meschiti) ning imami möhtirem shériplerni sözletken.

Shinxu'a torining xewiride munular déyilgen: "Sin yighinida shinjangning tebi'iy menzirisi, tereqqiyat muweppeqiyetliri we kishilerning bextlik turmushini ekis ettüridighan bir yürüsh qisqa filimlar qoyuldi. Abduréqip tömürniyaz we möhtirem shéripler filimgha birleshtürüp turup, shinjangning diniy étiqad erkinlikini tonushturdi. Shinjangdiki kespiy maharet we terbiyelesh merkizini püttürgen oqughuchilar özlirining ashqun idiyelerdin qutulush we emgek maharitini igilesh jeryanlirini shundaqla öginish arqiliq érishken normal turmushigha a'it kechürmishlirini sözlep berdi. . ."

Melum bolushiche, bu sin yighinida yene Uyghur aptonom rayonluq partkomning da'imiy hey'iti we xelq hökümitining mu'awin re'isi erkin tuniyazmu söz qilip: "Shinjangda uda töt yildin buyan zorawanliq térorluq weqesi yüz bermidi, kishilerning bixeterlik tuyghusi körünerlik ashti," dégen kona muqamini tekrarlighan. Xitayning jenwede turushluq da'imiy wekili chén shü bolsa "Bezi döletler we bezi küchler shinjangdiki yaxshi weziyetni körüshni xalimaydu hemde pakitni qesten burmilap, xitayni haqaretleydu we yalghan sözleydu," dégen.

Yuqiriqi bu teshwiqat yighinigha la'os, kuba, shimaliy koriye, rosiye, pakistan, iran, éritriye qatarliq diktatorluq bilen dangqi chiqqan asiya-afriqadiki bir qisim döletlerning wekilliri anglighan.

Chet ellerdiki Uyghur közetküchiler buni xitay hökümitining xel'ara sehnilerdiki eng axirqi quruq urunushliri, dep hésablimaqta. Ular amérika hökümiti xitayning Uyghur élida yürgüziwatqan zulumlirini "Irqiy qirghinchiliq" we "Insaniyetke qarshi jinayet" dep bahalighan, gherb metbu'atlirida bu heqtiki delil-pakitlar arqa-arqidin pash boluwatqan bir ehwalda, xitay hökümitining herqanche qilipmu özini aqlap bolalmaydighanliqini bildürüshmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet