Xitayning Uyghur élidiki ahalilerning bixeterlik tuyghusi heqqidiki teshwiqati guman peyda qilmaqta

“Shinjang géziti” ning xewirige qarighanda, 20-féwral küni Uyghur aptonom rayonluq uniwérsal tüzesh ishxanisi bayanat élan qilip, 2015-yilida Uyghur élidiki ahalilerning bixeterlik tuyghusining aldinqi yillargha qarighanda yuqiri kötürülgenlikini ilgiri sürgen.

Bayanatta mundaq déyilgen: “2015-Yili Uyghur aptonom rayonidiki ammining nöwettiki weziyetke bolghan razimenlik tuyghusi 88 pirsenttin ashqan. Buning ichide ammining siyasiy-qanun organlirigha bolghan razimenlik tuyghusi 89 pirsentke, yüz bergen weqelerdin xewer tépish derijisi 86 pirsentke yetken. Buning bilen rayonda 2009-yilidin buyan ammining weziyetke bolghan eng yuqiri ishench tuyghusi hasil qilin'ghan.”

Bayanatta yene Uyghur aptonom rayoni boyiche 6 wilayet we oblastning, 89 nahiyening hemde 141 yéza, bazarning “Munewwer bixeter orun” bolup bahalan'ghanliqi qeyt qilin'ghan.

Halbuki, xitay hökümet taratqulirining bu heqtiki teshwiqat xewerliri xelq'ara jem'iyette so'al peyda qilmaqta. Közetküchiler, baydiki kömürkan'gha hujum qilish weqeliridek bir qatar qanliq toqunushlar üzülmey yüz bérip turghan Uyghur élida “Ammining bixeterlik tuyghusi yuqiri kötürüldi” déyish elwette guman qozghaydu, dep qarimaqta.