Xitay 30 gha yéqin dölettiki siyasiy partiye wekillirini Uyghur élini ziyaret qildurghan

Muxbirimiz irade
2019-02-28
Élxet
Pikir
Share
Print

Xitay hökümiti Uyghur élidiki lagér tüzümini aqlash üchün élip bériwatqan teshwiqat herikitini yene dawamlashturmaqta. Xitayning shinxu'a agéntliqi 28-féwral küni tarqatqan bir xewiride charshenbe küni 30 gha yéqin dölettiki siyasiy partiyelerge tewe 200 etrapida wekilning Uyghur élini ziyaret qilghanliqini bildürdi.

Shinxu'a agéntliqining ilgiri sürüshiche, herqaysi siyasiy partiyeler wekilliri ürümchidiki chong bazar we islam institutini, meschitlerni we shundaqla "Bir belwagh bir yol" istratégiyisi qarmiqida échilghan yéngi shérketlerni ziyaret qilghan. Andin kéyin xitay hökümitining az sanliq milletler siyasitini aghzi-aghzigha tegmey maxtighan. Uyghur aptonom rayonluq partkomning sékrétari chén chu'en'go bolsa bu méhmanlarni kütüwalghanda "Uyghur élidiki milletlerning diniy étiqad erkinliki toluq kapaletke ige" dep söz qilghan. 

Xitay hökümiti Uyghur élidiki lagérlar seweblik xelq'ara kishilik hoquq organlirining we shundaqla amérikaning küchlük tenqidige uchrighandin kéyin özining Uyghurlarni basturush herikitini aqlash üchün heriketke ötken. Xitay da'iriliri bultur 12-aydin étibaren pakistan, hindistan, hindonéziye qatarliq döletlerning diplomatlirini we bir qisim muxbirlarni qeshqer, xoten, atush qatarliq sheherlerdiki atalmish "Kespiy maharet bilen terbiyilesh merkezliri" ni ziyaret qilishqa teshkillep kelmekte. 

Yuqiriqi siyasiy partiyeler wekillirining konkrét qaysi döletlerdin kelgenliki melum emes. Biraq shinxu'a agéntliqining xewiride peqet türkiye kommunistliridin weten partiyesining bashliqi doghu périnchek, népal kommunistik partiyesining bashliqi chandira prakash, péru kommunistik partiyesining bashliqi lu'is albérto, sérbiye sotsiyalistlar partiyesining wekili markowich, rusiye kommunistik partiyesi merkizi komitétining ezasi aléksi léskin we i'ordaniye, pakistanning isimlirini tilgha alghan. 

Chet'ellerdiki közetküchiler xitay hökümitining aldin pilanlap orunlashturghan chet'el siyasiy partiyelirining bu ziyaritige yéqindin diqqet qilmaqta. Ularning ilgiri sürüshiche, xitay hökümitining özige yéqinliqi bilinidighan döletlerning déplomatlirini we kommunist partiyelerning wekillirini teklip qilip Uyghur diyarini ziyaret qildurush arqiliq emeliyetni burmilimaqchi bolghanliqi bihude urunushtin bashqa nerse emes iken.

Toluq bet