Xitay Uyghur élining weziyiti heqqide dölet ichi we sirtigha oxshimighan muqamda xewer bermekte

Muxbirimiz qutlan
2017-03-13
Share

Tengritagh torining xewirige qarighanda, béyjingdiki "Ikki yighin" gha qatnishiwatqan "Shinjang wekilliri" 12-mart chüshtin kéyin muxbirlarni kütüwélish yighini uyushturghanliqi melum.

Xewerde déyilishiche, "Wekiller" xitay we chet'ellerdiki 79 xewer agéntliqining 100 din artuq muxbiri qatnashqan yighinda Uyghur élining "Muqimliqi we nöwettiki tereqqiyati" heqqide pikir bayan qilghan.

Igilinishiche, atalmish "Shinjang wekilliri" xitay we chet'el agéntliqlirining so'allirigha jawab bérip, "Uyghur aptonom rayonining nöwette muqim tereqqiyat menzirisi ichide turuwatqanliqi, "bir yol bir belwagh" istratégiyesining rayondiki her millet xelqige ghayet zor nep élip kelgenliki" ni bes-beste maxtashqan.

Xewerde nami tilgha élin'ghan chet'el muxbirlirining hemmisi dégüdek xitay bolup, "Amérika jungxu'a soda géziti" ning muxbiri jin lidong özining "Bir elchi bolup shinjangning güzel we heqiqiy ehwalini dunyagha bildürüshni xalaydighanliqi" tilgha élin'ghan.

Halbuki, aridin bir kün ötkende, yeni 13-mart küni Uyghur aptonom rayonluq siyasiy-qanun komitétining sékrétari ju xeylun chén chüen'goning hawalisi bilen jenubtiki 3 wilayet 2 oblastning kadirlirigha "Muqimliq xizmiti" boyiche jiddiy yighin achqan. Yighinda u asasiy qatlam kadirliridin "Muqimliqni saqlash üchün bashtin-axir yuqiri bésimliq siyasiy pozitsiyedin qet'iy tewrenmeslik" ni telep qilghan.

Uyghur aptonom rayonining re'isi shöhret zakirmu shu küni béyjingda shinxu'a agéntliqining ziyaritini qobul qilip, "Shinjang aldinqi yillarda térrorluqqa qarshi küresh qilishqa we muqimliqni saqlashqa mejbur boldi," dégen.

Xitay taratqulirining Uyghur élining nöwettiki weziyiti heqqide dölet ichi bilen xelq'aragha oxshimighan muqamda bir-birge zit xewer bérishi közetküchilerning diqqitini qozghimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.