"Shinjang géziti" ning tehrirat maqalisi: "Shinjangda térrorluq we diniy ashqunluqning tupriqi we shara'iti eng zor derijide yoqitildi"

Muxbirimiz erkin
2020-04-27
Élxet
Pikir
Share
Print

"Shinjang géziti" 27-aprél chong hejimlik tehrirat maqalisi élan qilip, xitayning xelq'arada "Medeniyet qirghinchiliqi" dep eyiblinip kéliwatqan Uyghur rayonidiki yéqinqi bir qanche yilliq siyasitini mu'eyyenleshtürgen.

Mezkur maqale xitay bash sékrétari shi jinpingning 2014-yili 4-ayning axirliri Uyghur aptonom rayonigha qilghan ziyaritining 6 yilliqi munasiwiti bilen élan qilin'ghan. Shi jinpingning shu qétimqi ziyariti xitayning Uyghurlargha qaratqan siyasitidiki radikal burulush nuqtisi bolup qalghan.

Yéqinda ashkarilan'ghan höjjetler xitayning Uyghurlarni keng kölemlik basturush qararining shu ziyarettin kéyin élin'ghanliqi, shi jinpingning Uyghurgha "Merhemet qilmasliq" heqqide buyruq chüshürgenliki melum bolghan idi.

"Shinjang géziti" ning tehrirat maqaliside ilgiri sürüshiche, da'iriler yéqinqi 6 yildin béri rayonda térrorluqqa qattiq zerbe bérish, kespiy maharet terbiyesi we terbiyelesh merkizi qurush qatarliq köp xil tedbirler arqiliq térrorluq, diniy ashqunluqning tupriqi we shra'itini eng zor derijide yoqatqan iken.

Maqalide yene xitayning bu jeryandiki "Tughqanchiliq" siyasiti, Uyghur a'ililirige xitay kadirlirini orunlashturush, emgek küchlirini yötkesh, ma'arip, medeniyet, diniy étiqad we bashqa jehetlerdiki radikal tedbirlirini mu'eyyenleshtürüp, bu arqiliq rayonning "Uzun muddetlik eminlikige tesir yetküzidighan chongqur qatlamliq mesililerni hel qilishta waqit we teshebbuskarliqqa érishkenliki" tekitlen'gen. Halbuki. Bu siyasetler xelq'arada Uyghurlargha qaritilghan "Medeniyet qirghinchiliq" dep eyiblinip, bu siyasetni ijra qiliwatqan chén chüen'go bashchiliqidiki xitay emeldarlirini jazalash telep qilinip kelgen idi.

Toluq bet