Xitay hökümitining "Merkezleshtürüp su bilen teminlesh qurulushi" teshwiqati guman qozghimaqta

Muxbirimiz eziz
2020-05-12
Élxet
Pikir
Share
Print

Uyghurlar diyaridiki "Namratliqtin qutuldurush" sho'ari astida otturigha chiqiwatqan yéngi tedbirlerning biri "Merkezleshtürüp su bilen teminlesh qurulushi" boluwatqanliqi melum. "Shinjang géziti" ning 12-may sanida nöwette 13 milyon déhqan-charwichining bu qurulushtin behrimen boluwatqanliqi alahide bayan qilin'ghan.

Xewerde éytilishiche, tarim wadisidiki herqaysi déhqan-charwichilarning yillardin buyan köl we quduq süyi ichishi bu jaylardiki türlük késelliklerning tüp menbesi iken. Emdilikte merkezleshtürüp su bilen teminlesh qurulushini toluq emelge ashurush we turuba süyi bilen teminlesh arqiliq bu halgha üzül-késil xatime bergili bolidiken.

Xewerde bu qurulushning xotenning herqaysi nahiye we yéziliridin aqsu etraplirighiche bolghan jaylarda emeliylishidighanliqi éytilidu. Shu qatarda téxi yéqinda toluq köchürüwétilgen derya boyi yézisidiki xelqning yéngi makan'gha köchkendin kéyin deslepki qedemde sap su ichish bextige muyesser bolghanliqi gewdilendürülidu. Yeken nahiyesi tagharchi yéziliq su ponkitining xadimi xanzorem özlirining herqachan ichimlik suning süpitini tekshürüp turidighanliqini éytip "Biz turubidiki suning süpitige toluq kapaletlik qilip kéliwatimiz" deydu.

Halbuki muhajirettiki bir qisim analizchilar bu qurulushning Uyghur déhqan-charwichilirigha bext élip kélishtin köre ulargha téximu zor kontrolluq we bashqa selbiy amillarni élip kélishi mumkinlikini algha sürmekte. Uyghurlar diyaridiki lagérlarda omumlishiwatqan qiz-chokanlarni tughmas qiliwétish qilmishi heqqide toxtalghan musteqil közetküchi élshat hesen bu heqte söz qilip "Bu su qurulushi asasen Uyghurlar topliship olturaqlashqan jaylarda dawam qilmaqta. Uningdiki suning terkibide qandaq éléméntlarning barliqigha birnerse démek qiyin" dédi.

Toluq bet