Хитай һөкүмитиниң америка гезитлиригә бәргән «ғәрәзлик» еланлири 19 милйон долларға йәткән

Мухбиримиз әзиз
2020-06-09
Елхәт
Пикир
Share
Принт

Хитай һөкүмитиниң америкадики чоң мәтбуат орунлириға хитайни тәшвиқ қилиш вә америкада һөкүмәткә қарши туйғу пәйда қилишни көзлигән һалда бәргән еланлири өткән төт йилда 19 милйон америка доллириға йәткән.

«Зор хәвәрләр тори» ниң 9-июндики хәвиридә ейтилишичә, хитай һөкүмити башқурушидики инглизчә «хитай хәвәрлири» гезити америкадики һәммигә мәлумлуқ «вашингтон почтиси» вә «вал стрет журнили» гезитигә айрим-айрим һалда бәш милйон долларчә елан бәргән. Буниңда хитай һөкүмитиниң мәвқәсәдики инглизчә мақалиләр бесилған «хитай хәвәрлири» гезити ашу дуняви гезитләрниң арисиға қистурулуп тарқитилған. Буниң билән адәттә һечким сетивелип оқумайдиған бу гезит «вашингтон почтиси» яки «вал стрет журнили» гезитини алғанларниң қолиға чиқидиған вәзийәт яритилған.

Хитай һөкүмитиниң бу гезитлиридә ғәрәзлик елан қилинған бәзи мақалиләр астриттин америкалиқларни америка һөкүмитигә наразилиқ билдүрүшкә йетәкләш ролини ойниған. Мәсилән, «таможна беҗи әмәлийәттә америкалиқларниң өй сетивелишиға зиянлиқ» дегән мақалида американиң таможна беҗини ашуруши хитайдин импорт қилинидиған яғачларниң баһасини өстүриветидиғанлиқи, буниң америкалиқларниң өй сетивелишиға сәлбий тәсир пәйда қилидиғанлиқи шәрһиләнгән.

Униңдин башқа америкадики оқурмәнлири көп болған чоң гезитләрниң һәммсила дегүдәк хитай һәққидики түрлүк еланларни бесиватқан болуп, хитай демократлири бу һәқтә агаһландуруш берип «хитай һөкүмити америка гезитлири арқилиқ америкада хитайни тәшвиқ қилмақта» демәктикән.

Пикирләр (0)
Share
Толуқ бәт