Uyghur rayonida xitay kommunistlirining teshwiqati yuqiri pellige chiqqan

Muxbirimiz jewlan
2021-06-23
Share

Xitay kompartiyesi qurulghanliqining 100 yilliqini xatirilesh Uyghur rayonidimu ewj alghan bolup, hökümet emeldarliridin tartip awam puqraghiche "Partiyege qesem bérish, partiyeni küylesh, partiyege rehmet éytish, partiyege menggü egishish" pa'aliyetliri janlinip ketken.

Xitay taratqulirining xewer qilishiche, 6-ayning 22-küni shinjang Uyghur rayoni partkomning sékritari chén chüen'go, mu'awin sékritari shöhret zakir we bingtu'en emeldarliri "8-Armiyening shinjangda turushluq ish béjirish orni xatire sariyi" da ziyaret we öginishte bolghan hemde yéngi partiyege kirgenler bilen birlikte qesem bérip, "Partiye rohi" ni qayta urghutqan. Chén chüen'go yene yéngi partiye ezaliri wekillirini qobul qilip, shi jinpingning "Yéngi dewr xitay sotsiyalizmi idiyesi" bilen qorallinip, xitay kompartiyesining shinjang siyasitini qet'iy izchillashturushi üchün töhpe qoshushigha ilham bergen.

Uningdin bashqa, Uyghur rayonida yene "Wetenperewerlik terbiyeside nemunilik besh orun" bahalinip chiqqan bolup, ular xitay ishchi-déhqan 4-qizil armiyesining shinjanggha kirish xatire sariyi, maw zémin (maw zédungning inisi) xatire öyi, qaramay muzéyi, qurban tulum xatire sariyi, wujya chü shehiri herbiyler boz yer özleshtürüsh muzéyi qatarliqlar iken.

Közetküchilerning bildürüshiche, xitay kompartiyesi özining teshwiqat xizmitige ezeldin ehmiyet bérip kelgen bolup, atalmish "Partiye medeniyiti" uning yadroluq qismi hésablinidu. Shi jinping textke chiqqandin bashlap xitay kommunistlirining Uyghur rayonidiki teshwiqat pa'aliyiti keng-kölemlik we zorawanliq bilen élip bérildi. Chén chüen'go qatarliqlarning bu qétimliq qesem bérishi kommunist xitayning bu rayonda éghir bésimgha uchrawatqanliqini, qanche bésimgha uchrighanche "Adaqqiche küresh qilish" qesemlirini shunche ünlük waqiraydighanliqini körsitip béridu. Xitayning "Wetenperwerlik terbiyesi" élip baridighan nemunilik orunliri asasen dégüdek kommunist xitayning ishghaliyet tarixini xatirilesh arqiliq, öz hakimiyitini mustehkemleshni meqset qilghan orunlar hésablinidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet