Xitay teshwiqat orunliri ürümchidiki chong bazarni muhim teshwiqat nuqtisi qilmaqta

Yéqinda ötküzülgen “Xitay-yawro asiya yermenkisi” künliride xitay hökümiti chaqirip kelgen chet el muxbirliri ürümchidiki chong bazarni sayahet qilip, buningdin alghan “Ajayip tesiratliri” ni bayan qilishqan.

30-Iyul küni “Téhran waqti” gézitining bir muxbiri ürümchidiki chong bazar heqqide tepsiliy xewer élan qilghan. Xewerde bu bazarning 2002-yili qurulup, 2003-yil ammigha échiwétilgenliki, bazarda ottura asiya medeniyitige xas buyumlarning köplüki we bu yerde 100 xildin artuq nan körgezme qilinidighan “Nan muzéyi” ning barliqi dégendek tepsilatlarni bayan qilghan.

Bu xewerde éytilishiche, xitay ammiwi diplomatiye jem'iyiti(CPDA) qarmiqidiki xelq'ara taratqu alaqe merkizi (CIPCC) “Shinjanggha sayahet” pirogrammisi yolgha qoyghan bolup, muxbirlarning xitayni ziyaret qilishi we xitaydiki tereqqiyatni körüshige yol échishni meqset qilghan. Uninggha dunyaning her qaysi jayliridiki muxbirlar, bolupmu tereqqiy qiliwatqan döletlerning muxbirliri teklip qilin'ghan. Xitay hökümiti 2024-yil 2-aydin bashlap, 90 nechche dölettin 100 muxbirni bu pirogrammigha qatnashturghan.

Xewerde körülginidek, xitay hökümiti 2024-yilda “Shinjang hékayisini yaxshi éytish” teshwiqatini alahide kücheytken bolup, xitaygha “Dostane” döletler, tereqqiy qiliwatqan döletler, jümlidin ereb-islam döletlirining muxbirlirini arqa-arqidin teklip qilip kelgen, shundaqla ularning “Shinjang teshwiqati” ni qilishigha sorun hazirlap bergen hemde barliq taratqu wasitiliridin paydilinip ularni dunyagha tarqatqan. Bu heqte radiyomizda pikir bayan qilghan mutexessisler “Xitay hökümitining buningdiki meqsiti xelq'araning közini boyash we irqiy qirghinchiliq jinayitini yoshurush” dep körsetken idi.